Индо-Тынч океан аймагында аскердик кызматташтыкты тереңдетүү жана аймактык коопсуздукту чыңдоо максатында АКШ менен Индия 10 жылдык коргонуу алкактык келишимине кол коюшту.
АКШнын коргоо министри Пит Хегсет жана Индиянын коргоо министри Раджнат Сингх жума күнү Малайзиянын Куала-Лумпур шаарында өткөн биргелешкен басма сөз жыйынында бул келишимди жарыялашты.
Келишим Кытайдын аскердик экспансиясы жана аймактык таасири боюнча чыңалуу күчөп жаткан учурда, Вашингтондун Индия-Тынч океан аймагына узак мөөнөттүү милдеттенмесинин бир бөлүгү катары түзүлдү.
Хегсет бул келишимди "амбициялуу" деп мүнөздөп, эки өлкөнүн аскерлеринин координациясын жакшыртарын белгиледи. "Бул биздин эки армиябыз үчүн маанилүү кадам. Тереңирээк жана маанилүү кызматташтык үчүн жол картасы," – деп айтып, мунун коопсуз жана гүлдөп-өнүккөн Индо-Тынч океан аймагына карата жалпы милдеттенмени чагылдырганын кошумчалады.
Ал Вашингтон менен Жаңы Делинин өнөктөштүгү "өз ара ишеним жана жалпы кызыкчылыктарга" негизделгенин баса белгиледи.
АКШнын коргоо министри бул жаңы келишим "Америка менен Индиянын орток коопсуздукка жана жалпы көз карашка болгон узак мөөнөттүү милдеттенмесин" бекемдей турганын билдирди.
‘Жаңы барак’
Коргоо министри Раджнат Сингх келишимди кубаттап, эки өлкөнүн ортосундагы стратегиялык шайкештиктин өсүп жатканын айтты жана аймактагы тынчтыкты жана коопсуздукту сактоого чечкиндүүлүгүн баса белгиледи.
"Биз үч жолу телефон аркылуу сүйлөштүк. Сиз менен бетме-бет жолугушуп жатканыма кубанычтамын... Ушул алкакта Коргонуу келишимине кол коюлушу менен жаңы барак ачылат деп ойлойм... Сиздин жетекчилигиңиз астында Индия-АКШ мамилелери дагы бекемделет деп ишенем” – деди Сингх.
Индия менен АКШнын ортосундагы коргонуу келишими Индиянын премьер-министри Нарендра Модинин Вашингтонго болгон сапары жана Ак үйдө АКШнын президенти Дональд Трамп менен жолугушуусу учурунда макулдашылган.
Эки лидер февраль айынын ортосунда экономика жана коргонуу тармагындагы эки тараптуу мамилелерди чыңдоого берилгендигин көрсөтүү үчүн кадамдарды жасашкан. Бирок Украинадагы согуш жана Жаңы Делинин Орусиядан мунай жана коргонуу жабдууларын сатып алуусу Жаңы Дели менен Вашингтондун мамилелерин курчутту.
Бул келишим эки өлкөнүн ортосунда коргонуу жабдыктарын жана кызматтарын сатып алууну жеңилдетип, камсыздоо процессин натыйжалуураак кылат жана АКШ менен Индиянын аскер күчтөрүнүн өз ара аракеттенүүсүн жакшыртат деп күтүлүүдө.
