Жекшемби күнү Малайзияда Түштүк-Чыгыш Азия Улуттары Ассоциациясынын (ASEAN) саммити ачылып, анда лидерлер Чыгыш Тиморду уюмдун 11-мүчөсү катары тосуп алышты. Бул уюмдун акыркы 26 жыл ичиндеги биринчи кеңейиши болуп саналат.
Малайзиянын премьер-министри Анвар Ибрахим 47-саммитти өткөрүп жатат, ал шейшембиге чейин уланат. Малайзия бул уюмга 1967-жылдан бери бешинчи жолу төрагалык кылууда.
Куала-Лумпур Конвенция Борборундагы ачылыш аземинде лидерлер Чыгыш Тиморду расмий кабыл алуу үчүн кол коюу аземине катышты. Чыгыш Тимор 2011-жылы мүчөлүккө арыз берген жана 2022-жылы байкоочу макамын алган.
ASEAN уюму 1967-жылдын 8-августунда Бангкокто негизделген жана анын курамына Бруней, Камбоджа, Индонезия, Лаос, Малайзия, Мьянма, Филиппин, Сингапур, Таиланд жана Вьетнам кирет.
Малайзиянын премьер-министри Анвар Ибрахим саммиттин алкагында ASEAN мүчө мамлекеттеринин лидерлерин, ошондой эле АКШ, Түштүк Африка, Бразилия, Кытай, Япония, Түштүк Корея жана башка негизги өнөктөштөрдүн лидерлери менен жогорку даражалуу өкүлдөрүн кабыл алууда. Саммиттин темасы “Инклюзивдүүлүк жана туруктуулук” деп аталат.
АКШнын президенти Дональд Трамп да саммитке катышып, Анвар Ибрахим менен бирге Камбоджа жана Таиланд ортосундагы тынчтык келишимине кол коюу аземине катышат. Бул эки өлкө июль айында чек арадагы кагылышуулардан улам курчуп кеткен мамилелерин жөнгө салуу үчүн келишимге жетишти.
1,3 миллион калкы бар Чыгыш Тимор 2002-жылы көз карандысыздыкка жетишкен жана 1999-жылы Камбоджа мүчө болгондон бери Түштүк-Чыгыш Азия Улуттары Ассоциациясына кошулган биринчи мамлекет болуп калды.
