Немис өкмөтү 2024-жылдын 1-январынан 2025-жылдын 26-июнуна чейин Израилге 294 миллион долларлык аскердик техника жана курал экспорттоого уруксат бергенин ырастады.
Расмий маалыматтарга караганда, экспорттук лицензиялар 2024-жылы 189 миллион долларды, 2025-жылдын биринчи чейрегинде болсо 33 миллион долларды түзгөн.
Өкмөт бул маалыматтарды Израилге курал экспортун дароо токтотууну талап кылган оппозициялык Солчул партиянын парламенттик иликтөөсүнө жооп катары жарыялады.
Германия Израилди көптөн бери колдоп келет. Саясий лидерлер бул колдоону Германиянын нацисттик өтмүшү жана Холокосттон келип чыккан тарыхый жоопкерчилиги менен байланыштырышат.
Өткөн жылы Никарагуа Германияны Газадагы геноцидге катыштыгы бар деп айыптап Эл аралык адилет сотуна доо арыз бергенде, Германиянын Израилге курал экспорту кыска мөөнөткө токтотулган.
Бирок Германиянын расмий өкүлдөрү Израилден эл аралык мыйзамдарды сактоо боюнча жазуу жүзүндөгү кепилдиктерди алышканын айтып, экспортту кайра башташкан. Ошондой эле, Ирандан келип чыккан коркунучтарды да курал жөнөтүүнү улантуунун негизги себеби катары көрсөтүшкөн.
Израиль 2023-жылы Газада аскердик операциясын баштагандан бери 58 миңден ашуун палестиналык, көбү аялдар жана балдар набыт болуп, 100 миңден ашуун киши жаракат алды.
Учурда Израиль Газадагы аракеттеринен улам Эл аралык адилет сотунда геноцид боюнча айыпталып жатат. Кеминде 1 миллион 900 миң палестиналык жер которгон Газада эл тамак-аштын, медициналык буюмдардын жана башка негизги керектөөлөрдүн жетишсиздигине дуушар болууда.
