Ирандын президенти Масуд Пезешкиан БРИКС саммитинин алдында Индияда жасаган билдирүүсүндө АКШнын өлкөсүнө карата кысымы өтө кооптуу жана коркунучтуу этапка жеткенин айтты.
Ирандын лидери жума күнкү билдирүүсүндө : "Иран акыркы жылдары катуу санкцияларга дуушар болду; бул кысым акыркы айларда АКШ менен Израилдин аскердик чабуулдарынан кийин өтө кооптуу жана коркунучтуу этапка жетти", - деди.
Пезешкиан: "Бүгүн дүйнө болуп көрбөгөндөй башаламандык мезгилди өткөрүп жатат",- деп кошумчалады.
Өткөн айда АКШ Тегеранга каршы жүргүзүлүп жаткан согуштун алтынчы айында Иран өкмөтүнүн «бардык калган экономикалык жашоо булактарын» үзүүгө багытталган «Экономикалык четтетүү операциясы» деп аталган «теңдешсиз» чектөө пакетин киргизди.
Тегерандын туруктуулугу
Буга чейин Ирандын президенти Масуд Пезешкиан АКШ менен согушту улантууну колдобой турганын билдирип, өлкөнү алдыдагы окуяларга даярдоо үчүн туруктуулукту күчөтүүгө чакырган.
«Mehr» маалымат агенттигинин билдиргенине караганда, Пезешкиан бул билдирүүнү Ирандын университет ректорлору менен жолугушууда жасаган.
«Мен согушту улантууну жактабайм, бирок алдыдагы окуяларга карата өлкөнүн туруктуулугун бекемдешибиз керек», — деди Пезешкиан.
18-июнда АКШ менен Иран аскердик операцияларды токтотуу боюнча меморандумга келишкен. Ага ылайык, Ормуз кысыгы аркылуу соода кемелеринин өтүшүнө кепилдик берүү жана 60 күндүн ичинде акыркы келишимге жетишүү боюнча сүйлөшүүлөрдү баштоо каралган.
Бирок кийин бул келишим бузулуп, июль айында согуш аракеттери кайра башталган. АКШ Ирандагы буталарга чабуулдарын жандандырып, өлкөнүн портторуна деңиз блокадасын кайра киргизген.
