Орусиянын мурдагы президенти Дмитрий Медведев Москванын орто жана кыска аралыктагы өзөктүк ракеталар боюнча мораторийден баш тартуусуна НАТО өлкөлөрүн күнөөлөдү.
Учурда Орусиянын коопсуздук кеңешинин төрага орун басары катары кызмат өтөп жаткан Медведев, дүйшөмбү күнү X социалдык тармагынан жасаган билдирүүсүндө: «Орусиянын Тышкы иштер министрлигинин орто жана кыска аралыктагы ракеталарды жайгаштыруу боюнча мораторийден баш тартуу тууралуу билдирүүсү НАТО өлкөлөрүнүн антиорусиялык саясатынын натыйжасы», – деп айтты.
«Бул биздин каршылаштарыбыз кабыл алышы керек болгон жаңы чындык. Кийинки кадамдарды күтүүгө даяр болгула», – деп кошумчалады ал.
Анын бул билдирүүлөрү Орусиянын Тышкы иштер министрлиги Москва «мурун кабыл алынган чектөөлөргө» мындан ары баш ийбей турганын жарыялагандан кийин айтылды. Бул чектөөлөр 1987-жылы АКШ менен Советтер Союзунун ортосунда түзүлгөн Орто аралыктагы өзөктүк күчтөр (INF) келишимине ылайык кабыл алынган болчу.
Бул келишим АКШ менен Советтер Союзун 500дөн 5500 чакырымга чейинки аралыктагы өзөктүк жана кадимки жерден учурулган баллистикалык жана канаттуу ракеталарды жок кылууга жана алардан түбөлүк баш тартууга милдеттендирген.
«Өтө этият болгула»
АКШ, Дональд Трамптын биринчи президенттик мөөнөтүндө, 2019-жылы бул келишимден чыгып кеткен болчу. Ага себеп катары Орусиянын келишимди бузганын көрсөткөн. Ал эми Орусия бул айыптоолорду четке каккан.
Москва дүйшөмбү күнү бул жарыяны Трамп өткөн аптада Орусияга жакын эки америкалык өзөктүк суу астындагы кайыктарды жайгаштырууну буйрук кылгандан кийин жасады. Бул чечим Медведев менен АКШ президентинин социалдык тармактардагы курч пикир алмашуусунан кийин кабыл алынган.
Кремлдин басма сөз катчысы Дмитрий Песков дүйшөмбү күнү Орусия өзөктүк маселелер боюнча билдирүүлөргө «өтө этият» мамиле жасап жатканын жана бул жаатта «жоопкерчиликтүү позицияны» карманып жатканын билдирди.
«Орусия өзөктүк куралдарды жайылтпоо маселесине өтө кылдат мамиле кылат. Албетте, биз баары өзөктүк риторикага өтө этият болушу керек деп эсептейбиз», – деди Песков журналисттерге.
Трамп Орусияны Украинадагы согушун токтотпосо санкциялар менен коркутуп, жекшемби күнү өзүнүн атайын өкүлү Стив Виткоффту АКШнын санкцияларынын мөөнөтү бүтөр алдында ушул аптада Орусияга жибере турганын айтты.
