Бириккен Улуттар Уюмунун Климаттын өзгөрүшү боюнча алкактык конвенциясынын аткаруучу катчысы Саймон Стилл Батыш Европанын көпчүлүк бөлүгүнө таасир эткен алгачкы ысык толкуну "климаттык кризистин барган сайын күчөп бараткан кесепеттерин эскертип" жатканын айтты.

Ушул аптада Британия менен Франция май айындагы эң жогорку температураны катташты, ал эми "жылуулук күмбөзү" деп аталган аба ырайы кубулушу Батыш Европага жайдын ортосундагыдай аптаптуу ысыкты алып келди.

Стилл адам өмүрүн, ишкердикти жана экономиканы ченемден тышкары ысыктан жана өсүп жаткан чыгымдардан коргоо ар бир өлкө үчүн эң башкы артыкчылык болушу керектигин билдирди.

«Бул, биринчи кезекте, казылып алынуучу отунга (фоссилдик отунга) болгон көз карандылыктан тезирээк кутулуудан башталат», — деген Стилл Жакынкы Чыгыштагы согуш да бул көз карандылыктын өсүп жаткан чыгымдарын көрсөтүп, таза энергия булактарына өтүү зарылчылыгын ортого салганын кошумчалады.

Францияда бийликтер ысык аба толкунуна байланыштуу кеминде жети өлүм катталганын билдиришти. Бул өлүмдөрдүн бешөөсү салкындоо үчүн суу жээгине барган адамдардын чөгүп кетишинен улам болгон.

Британияда жетекчилер жекшемби күнүдөн бери төрт өспүрүмдүн сууга чөгүп каза болгонун жарыялашты.

Франция менен Британияда дүйшөмбү күнү май айындагы рекорддук температура катталып, шейшемби күнү бул көрсөткүч дагы бир жолу жаңыланды.

Ирландияда да май айында рекорддук температура катталып, ал эми Испания, Италия жана Австрияда да жылдын бул мезгилинде адаттан тыш ысык аба ырайы байкалды.