Түркиянын президенти Режеп Таййип Эрдоган АКШнын президенти Дональд Трамптын Израиль-Иран жаңжалын токтотуу боюнча акыркы билдирүүлөрүн кубаттап, бүткүл аймакты каптай турчу апааттын алдын алуу үчүн чукул кадамдар жасалышы керектигин баса белгиледи.

Эки лидер Израиль-Иран жаңжалы, эки тараптуу алакалар жана аймактык маселелер боюнча телефон аркылуу сүйлөшүү өткөргөнүн Түркиянын Коммуникация башкармалыгы жекшемби күнү X платформасында кабарлады.

Эрдоган, Ирандын өзөктүк программасына байланыштуу маселени чечүүдө жалгыз туура жолдун дипломатия экенин дагы бир жолу баса белгилеп, бул темада бардык күч-аракетти жумшоого, ал тургай ортомчулук кылууга даяр экенин билдирди.

Түркиянын президенти, Израилдин Иранга чабуулдары эки тарап үчүн тең “кайтарылгыс экономикалык жана жарандык зыяндарды” алып келгенин айтып, бул коркунучтуу жолдун токтотулушу керектигине басым жасады.

Трамп жекшемби күнү Truth Social платформасында "Иран менен Израиль келишим түзүшү керек жана түзүшөт" деп билдирип, тынчтыкка жетишүү үчүн көптөгөн сүйлөшүүлөр жана чакырыктардын уланып жатканын айтты.

‘Тез арада чара көрүү’

Иран менен Израилдин ортосундагы жаңжал жума күнү эртең менен Израиль Ирандын аскердик жана өзөктүк объектилерине сокку урганда башталган. Бул чабуулдарда Ирандын бир топ жогорку командирлери жана илимпоздору каза тапкан.

Израиль чабуулдарын улантып жатканда Иран да жооп кайтарган соккуларды жасоодо.

Трамп менен Эрдоган ишемби күнү телефон аркылуу сүйлөшүшкөн.

Түркиянын президенти Режеп Таййип Эрдоган АКШнын президенти Дональд Трамп менен телефон аркылуу сүйлөшүүсүндө, Иран-Израиль жаңжалынын Жакынкы Чыгышты каптап кетишине жол бербөө үчүн “шашылыш чара көрүү” керектигин айтты.