Париждеги Лувр музейине уурулар терезе аркылуу кирип, «баа жеткис мурастык» зер буюмдарды уурдап, андан кийин мотоциклдер менен качып кетишкенин Франциянын ички иштер министрлиги жекшемби күнү билдирди.

Министрликтин билдирүүсүндө:«Тергөө башталды жана уурдалган буюмдардын так тизмеси түзүлүүдө. Бул буюмдардын базар баасынан тышкары, алардын мурастык жана тарыхый баалуулугу баа жеткис», – деп айтылды.

Окуя болгон учурда коомчулуктун арасынан, Луврдын кызматкерлеринен жана укук коргоо органдарынан эч ким жабыркабаганы билдирилди.

Музей X социалдык тармагында «өзгөчө себептерден улам» бир күнгө жабык болорун билдирди.