Иран 28-февралда Минаб шаарынын түштүгүндөгү башталгыч мектепке жасалган ракеталык чабуулду "кечирилгис" согуш кылмышы деп атап, күнөөлүүлөрдү жоопко тартууну талап кылды.

Тышкы иштер министрлигинин басма сөз катчысы Исмаил Бекайи шаршемби күнкү билдирүүсүндө, 168 окуучунун өмүрүн алган чабуул жазасыз калбашы керектигин айтты.

X баракчасындагы билдирүүсүндө Бекайи 28-февралда Минаб шаарында "эки жолу атылуучу америкалык Томагавк ракетасы" менен жасалган чабуул "168 кичинекей ирандык периштени өлтүргөнүн" айтып, мунун "жазасыз калбашы керек болгон кечирилгис, оор согуш кылмышы" экенин кошумчалады.

Ирандын мамлекеттик телеканалы мурда чабуул Ирандын түштүгүндөгү Хормозган провинциясына караштуу Минаб шаарындагы кыздардын башталгыч мектебин бутага алганын билдирген. Маалыматка ылайык, окуучулар жана мугалимдер менен кошо 170тен ашык адам каза болгон.

АКШнын президенти Дональд Трамп чабуулдун артында Иран турганын айтып, "Көргөндөрүмө таянсам муну Иран жасады" деген эле.

Чабуул АКШнын аскерлери тарабынан кеңири колдонулган Tomahawk канаттуу ракеталары менен жасалган деген маалыматтардан кийин Трамп эч кандай далил келтирбестен, Иранда Tomahawk ракеталары бар экенин айткан. Кийинчерээк бул доомат жалган экени далилденген.

Шаршемби күнү АКШнын маалымат каражаттарында жарыяланган жаңылыктарда, уланып жаткан аскердик иликтөөнүн алгачкы жыйынтыктарына караганда, чабуулду АКШнын аскерлери жасаган болушу мүмкүн экени жазылды.

Чабуул боюнча тергөө иштери уланууда.