Пакистандын коргонуу өндүрүш министри Түркия, Пакистан жана Сауд Арабиясынын дээрлик бир жылга созулган сүйлөшүүлөрдөн кийин коргонуу келишиминин долбоорун даярдашканын, бул аймактык коопсуздук кызматташтыгын тереңдетүү багытындагы мүмкүн болгон кадамдын белгиси экенин билдирди.
Түркиянын тышкы иштер министри Хакан Фидан сүйлөшүүлөрдү тастыктады, бирок азырынча эч кандай келишимге кол коюла электигин баса белгиледи.
Пакистандын коргонуу министри Раза Хаят Харраж бейшемби күнү Рейтер агенттигине сунушталган үч тараптуу келишимдин Пакистан менен Сауд Арабиясынын ортосунда өткөн жылы жарыяланган эки тараптуу коргонуу келишиминен өзүнчө экенин айтты.
Харраж келишимди аягына чыгаруудан мурун үч өлкөнүн ортосунда акыркы келишимдин түзүлүшү керектигин билдирди.
Харраж:"Пакистан-Сауд Арабиясы-Түркия үч тараптуу келишими буга чейин эле даярдык баскычында болгон нерсе. Келишимдин долбоору бизде ансыз да бар. Сауд Арабиясында да бар. Түркияда да бар. Үч өлкө тең сүйлөшүүлөрдү жүргүзүшүүдө. Бул келишим акыркы 10 айдан бери жүргүзүлүүдө", - деди.
Харраждын айтымында, сүйлөшүүлөр кеңири жайылган туруксуздуктун шартында коргонуу кызматташтыгын чыңдоо боюнча үч аймактык державанын жалпы кызыкчылыгын чагылдырат.
Фидан сүйлөшүүлөрдүн улантыларын айтты
Бейшемби күнү Стамбулда сөз сүйлөгөн тышкы иштер министри Хакан Фидан сүйлөшүүлөрдүн болгонун тастыктады бирок азырынча эч кандай келишимге кол коюла электигин баса белгиледи.
Фидан басма сөздө чыккан ыктымалдуу үч тараптуу келишим тууралуу суроолорго жооп берип жатып, сүйлөшүүлөрдү тар чөйрөдөгү альянсты түзүү эмес, аймактык кызматташтыктын кеңири контекстинде караш керектигин айтты.
Фидан: «Биздин сунушубуз аймактагы бардык өлкөлөр биригип, экономикалык кызматташтыкты коопсуздук платформасына айландыруу керек», - деди.
Эгер өлкөлөр «бири-бирине ишене алса», аймактык көйгөйлөр чечилиши мүмкүн экенин кошумчалаган Фидан сөзүн төмөнкүчө улантты: «Учурда сүйлөшүүлөр жана талкуулар болуп жатат, бирок биз азырынча келишимге кол коё элекпиз. Президент Режеп Таййип Эрдогандын көз карашы - кызматташтыкты жана туруктуулукту күчөтүүчү кеңири, комплекстүү платформа түзүү».
Фидан сөзүндө Пакистан же Сауд Арабиясы тууралуу түздөн -түз сөз кылган жок, бирок Түркия узак мөөнөттүү аймактык коопсуздукту камсыз кылган жана ишенимди бекемдеген демилгелерге ачык экенин билдирди.
Исламабад менен Анкаранын билдирүүлөрү үч өлкөнүн ортосунда дипломатиялык байланыштар уланып жатканын көрсөтүп турат, бирок расмий өкүлдөр сүйлөшүүлөрдүн азырынча кеңешүү этабында экенин баса белгилешүүдө.
