Трамп администрациясы, мыйзамсыз мигранттарга өз ыктыяры менен өлкөдөн чыгып кетүүгө макул болушса $1,000 төлөп берүүнү сунуштады. Бул ыкма арзан жана коопсуз болот деп айтылды.
АКШнын Ички коопсуздук департаменти билдиргендей, "мыйзамсыз мигранттар" CBP Home колдонмосу аркылуу өз ыктыяры менен чыгып кетсе, аларга акчалай жардам жана жол чыгымдары үчүн да колдоо көрсөтүлөт.
Бул акча мигранттар өз мекенине кайтып, колдонмо аркылуу процесс ырасталгандан кийин төлөнөт.
“Эгер сиз мыйзамсыз жүргөн болсоңуз, өз ыктыярыңыз менен чыгып кетүү – камакка алынуудан качуунун эң жакшы, коопсуз жана үнөмдүү жолу,” – деп билдирди Ички коопсуздук министри Кристи Ноем дүйшөмбү күнкү билдирүүсүндө.
Департаменттин кызматкерлери "өз ыктыяры менен депортациялануу Кошмо Штаттардан кетүүнүн ардактуу жолу болуп саналат жана мыйзамсыз чет элдиктердин АКШнын Иммиграция жана Бажы кызматы тарабынан аныкталбоосуна мүмкүндүк берет" деп түшүндүрүштү.
“Эң коопсуз жана үнөмдүү жол”
АКШда миллиондогон мыйзамсыз мигранттардын жашагандыгы болжолдонуп жатканда, Улуттук коопсуздук департаментинин кызматкерлери ыктыярдуу чыгып кетүүнүн учурдагы депортация процессинин чыгымдарын үчтөн экиге азайтарын айтышты. Азыркы учурда бир мыйзамсыз мигрантты кармоо, камоо жана өлкөдөн чыгаруу орточо $17,121 турат.
Ноем бул ыкма "укук коргоо органдарыбыз, чет өлкөлүк жарандар үчүн эң коопсуз вариант жана АКШнын салык төлөөчүлөрү үчүн 70 пайызды үнөмдөйт" деп кошумчалап, "БҮГҮН Home колдонмосун жүктөп алып, өз ыктыярыңар менен өлкөдөн чыгып кетиңиздер" деди.
Департаменттин кызматкерлери бул сунушту колдонгон биринчи мигранттын Чикагодон Гондураска учуп кеткенин жана дагы бир нече мигранттар жакынкы күндөрү өз ыктыяры менен чыгып кетүү үчүн билет сатып алганын билдиришти.
Ошондой эле өз ыктыяры менен чыгып кетүү ниетин билдирген мигранттар кетээр алдында "камалуу жана депортациялануу үчүн артыкчылык кезектен чыгарылат.
Мындан тышкары, Ички коопсуздук департаменти өз ыктыяры менен чыгып кетүүгө макул болгон мыйзамсыз мигранттардын келечекте АКШга мыйзамдуу түрдө кайтып келүү мүмкүнчүлүгүн сактап калууга жардам бериши мүмкүн экенин билдирди.
