Түркиянын Улуттук чалгындоо уюмунун (MIT) башчысы Ибрахим Калын Дамаскта Сириянын президенти Ахмед аль-Шараа, тышкы иштер министри Асад аль-Шайбани жана чалгындоо кызматынын жетекчиси Хусейн аль-Салама менен жогорку деңгээлдеги жолугушуу өткөрдү.
Шейшемби күнү бир нече саатка созулган сүйлөшүүлөрдүн негизги күн тартибин эки тараптуу мамилелерди калыбына келтирүү жана жарандык согуштан кийин Сирияны турукташтыруу темалары түздү.
Калын Түркиянын Сириянын аймактык бүтүндүгүн жана саясий эгемендүүлүгүн урматтай турганын баса белгилеп, Анкаранын тартипти калыбына келтирүү жана мамлекеттик мекемелерди кайра куруу аракеттеринде Дамаскка колдоо көрсөтүүгө даяр экенин билдирди.
Түрк жооптуу кызматкерлери Калындын: «Түркия Сириянын биримдиги жана узак мөөнөттүү ырааттуулугу үчүн чечкиндүү»,-дегенин айтышты.
Терроризмге каршы күрөш жана чек ара коопсуздугу
Сүйлөшүүлөрдүн дагы бир негизги темасы коопсуздук боюнча биргелешкен кызматташтык болду. Эки тарап куралдуу топторду, өзгөчө ПКК/ЙПГ террордук уюмун куралсыздандыруу жана Сириянын жаңы структурасына интеграциялоо маселесин талкуулашты.
Түркиялык өкүлдөр, чек арага жакын аймактардагы террордук аракеттерге байланыштуу көптөн бери айтылып келе жаткан тынчсызданууларын дагы бир жолу кайталап, эки өлкөнүн чек араларынын коопсуздугун камсыз кылуунун маанилүүлүгүн баса белгилешти.
Сүйлөшүүлөрдүн жүрүшүндө ДЕАШ менен байланышы бар түрмөлөрдү жана лагерлерди Сирия бийлигине өткөрүп берүү темасы да талкууланды. Анкара бул кадамды узак мөөнөттүү аймактык коопсуздук үчүн өтө маанилүү деп эсептейт.
Сүйлөшүүлөрдө ошондой эле чек араны башкаруу, негизги бажы дарбазаларын ачуу жана соода жолдорун реконструкциялоо сыяктуу кеңири стратегиялык маселелер каралды. Түркия согуштан катуу жабыркаган бул маанилүү инфраструктураларды калыбына келтирүүдө Дамаскка жардам берүүгө даяр экенин билдирди.
Аймактык жагдайлар күн тартибинде
Калын менен Сириянын жетекчилиги, аймактагы чыңалган кырдаалдарды, анын ичинде Сирия аймагына жасалып жаткан Израилдин аба соккулары жана аба мейкиндигин бузуу учурларын талкуулашты.
Мындан тышкары Сирияга карата киргизилген эл аралык санкциялардын жоюлушу жана ДЕАШ террордук уюмунун калдыктары менен күрөшүү да негизги темалардын арасында орун алды.
Дагы бир маанилүү маселе – сириялык качкындардын ыктыярдуу жана коопсуз кайтып келүүсү болду. Түркиялык расмийлер Анкаранын бул кайтып келүүлөрдү уюштуруу жана коопсуздук кепилдиктерин камсыздоо боюнча Дамаск менен кызматташууга даяр экенин билдиришти.
