Түркиянын башкаруучу Адилеттик жана өнүгүү партиясы Дамасктын борборундагы чиркөөгө болгон кандуу террордук чабуулдан кийин Сирияга көңүл айтты.

АК партиянын басма сөз катчысы Өмер Челик жекшемби күнкү билдирүүсүндө: «Дамасктагы чиркөөгө жасалган террордук кол салууда каза болгондордун жакындарына жана Сирия элине көңүл айтабыз. Боордош Сириянын коопсуздугун жана эгемендигин колдойбуз. Террорчулукка каршы күрөштө бир тууган Сириянын жанындабыз»,-деди.

Бул билдирүү Дамасктын чыгышындагы Мар Ильяс чиркөөсүнө жекшемби күнкү сыйынуу маалында ДЕАШ террордук уюмуна тиешеси бар жанкечти кол салгандан бир нече сааттан кийин айтылды.

Сирия бийлиги кол салган киши жардыргыч затты жардырар алдында ок чыгарып, кеминде 20 киши каза таап, 52 киши жарадар болгонун кабарлады.

Өткөн айдын этегинде Сириянын Ички иштер министрлиги Дамасктын айыл аймактарында кыймылын жүргүзгөн ДЕАШтын бир нече ячейкаларын талкалап, курал-жарак кампасын басып алганын жарыялаган.

Декабрда Асаддын режими кулап жана Баас партиясынын алтымыш жылдык башкаруусу аяктагандан бери, Сириянын коопсуздук күчтөрү кылмышка, адам укуктарын бузууга жана терроризмге байланыштуу иш-аракеттерге тиешеси бар делген адамдарды куугунтуктоосун улантууда. 

Асадды кулатуу үчүн режимге каршы күчтөрдү жетектеген Ахмед Шара январда өткөөл мезгилдин президенти болуп жарыяланган.