Кремль АКШнын президенти Дональд Трамптын Орусиянын президенти Владимир Путинди сындаганына "тынч" мамиле кылгандарын жана АКШ менен Орусиянын ортосундагы "бузулган" алаканы оңдоону уланта тургандарын билдирди.
Кремлдин басма сөз катчысы Дмитрий Песков журналисттерге: «Биз бул темада тынчсызданбайбыз»,- деди.
"Вашингтон менен диалогубузду улантууну жана олуттуу түрдө бузулган эки тараптуу мамилелерди оңдоо аракеттерин улантууну күтөбүз", - деп кошумчалады.
Трамп шейшемби күнү АКШнын Украинага коргонуу куралдарын жөнөтүүгө уруксат бергенин жана Москвага карата кошумча санкцияларды карап жатканын айтып, Орусиянын президенти Владимир Путинге болгон нааразычылыгын баса белгиледи.
Президенттикке талапкер кезинде Трамп согушту бир күндө токтотууга убада берген, бирок бул убадасын аткара алган жок жана анын администрациясынын тынчтыкты орнотуу аракеттери да ийгиликсиз болуп калды.
Песков Трамптын Орусия менен Украинанын ортосундагы жаңжалды чечүү оңой болбой турганын түшүнгөнүн айтты.
Дмитрий Песков: "Трамптын Украина жаңжалын жөнгө салуунун башында ойлогондон алда канча татаал экенин айтышы маанилүү билдирүү болду", - деди.
