АКШ армиясы 2003-жылы оккупацияга алган Ирактан чыгуу процесси аяктаганын жарыялады.
Пентагондун басма сөз катчысы Шон Парнелл чыгып кетүү процесси боюнча жазуу жүзүндө билдирүү жарыялады.
Парнелл АКШ менен Ирактын 2024-жылдын сентябрь айында кабыл алынган биргелешкен билдирүүсүнө ылайык жана "АКШнын улуттук кызыкчылыктарынын" алкагында АКШ жана коалициялык күчтөр Ирактан чыгып кетүү процессин аяктаганын билдирди.
Парнелл АКШнын Иракты оккупацияга алуу процессинде аймактагы террордук коркунуч жеңилгенин айтып: "Пешмерге жана Түндүк Ирактагы башка коопсуздук күчтөрү да болгон Ирак коопсуздук күчтөрүнүн Ирактын коопсуздугун камсыз кылуу жана ДЕАШтын калдыктарын жок кылуу боюнча уланып жаткан аракеттерге жол башчылык кылышын күтүп жатабыз",- деди.
Парнелл Пентагондун Иракка машыктыруу жана чалгындоо колдоосун улантарын белгилеп: "АКШ чек араларын коргогон, элин коргогон жана эки өлкөнүн ортосундагы терең коммерциялык, дипломатиялык жана коопсуздук кызматташтыгынын негизин түзгөн күчтүү жана эгемендүү Иракты колдойт",- деп билдирди.
Бир тараптан Ирактын премьер-министри Али аз-Зейди АКШ жетектеген эл аралык коалициянын өлкөдөгү ДЕАШ террордук уюмуна каршы күрөшүү миссиясы аяктаганын билдирди.
Зейди борбор шаар Багдадда "Эгемендүүлүк күнүн" жана эл аралык коалициянын миссиясынын аякташын белгилөө үчүн өткөрүлгөн расмий аземде сөз сүйлөдү.
Зейди эл аралык коалициянын ДЕАШка каршы күрөшүү миссиясынын аякташы достук мамиледеги өлкөлөрдүн жана элдердин ортосундагы кызматташтык "экстремизмдин жана жырткычтыктын эң караңгы мезгилдеринин бирине каршы жеңишке жеткенин" көрсөткөнүн айтып, Ирак элинин куралдуу күчтөр менен биргеликте жүргүзгөн күрөшү армиянын кайра түзүлүшүнө жол ачканын билдирди.
Зейди бул маанилүү күрөштө достук мамиледеги өлкөлөрдүн Иракка көрсөткөн колдоосу үчүн ыраазычылык билдирип, Ирактын куралдуу күчтөрүнүн катарын кайра түзүү менен курал-жарак жана жабдуулар жагынан да күчтөндүрүлгөнүн айтты.
Эл аралык коалицияга катышкан өлкөлөргө жана Ирактын коопсуздук күчтөрү менен иштеген командирлерге, офицерлерге, машыктыруучуларга жана кеңешчилерге ыраазычылык билдирген Зайди коалициянын миссиясынын аякташы терроризмге каршы күрөштүн аякташы дегенди билдирбей турганын баса белгиледи.
Зейди бул окуя Ирактын коопсуздук жана туруктуулугу үчүн толук жоопкерчиликти ала турган жаңы доорго өтүүнү билдирерин белгиледи.
Ирактын премьер-министри Зейди: "Мыйзамдын чегинен тышкары курал болбойт жана мамлекеттин институттарынан тышкары бийлик болбойт", - деп жарыялады.
2003-жылдын март айында Саддам Хусейндин режимин кулатуу үчүн Иракка басып кирген АКШнын өлкөдө тогуз белгилүү аскердик базасы болгон. АКШ 2011-жылы Ирактан чыкса да бул жердеги катышуусун ушул базалар аркылуу бекемдеген.
АКШнын 2003-жылы Ирактагы оккупациясы менен башталган башталган аскердик катышуусу, көп жылдык кыйроодон жана оор жоготуулардан кийин аяктап, чоң адамзат трагедиясы артта калды.
