Трамптын администрациясы Корнелл университетине 1 миллиард доллардан ашык жана Түндүк-Батыш университетине 790 миллион доллардан ашык федералдык каржылоону тоңдурууну чечти. Америкалык расмий өкүл мындай чечим эки окуу жайда тең жарандык укуктардын бузулушу боюнча жүргүзүлүп жаткан иликтөөлөргө байланыштуу болгонун билдирди.
Тоңдурулган каражаттардын басымдуу бөлүгү саламаттыкты сактоо, билим берүү, айыл чарба жана коргоо министрликтери менен түзүлгөн түрдүү гранттардан жана келишимдерден турат. Бул тууралуу маалымат берген аткаминер шейшемби күнү атын атабоо шарты менен билдирди.
АКШ президенти Дональд Трамптын администрациясы кампустардагы Палестинаны колдогон акыркы нааразылык акциялары жана көп түрдүүлүк, теңчилик жана инклюзия программалары сыяктуу маселелерден улам университеттерге федералдык каржылоону кыскартат деп коркутуп келет.
Өткөн айда Корнелл жана Түндүк-Батыш сыяктуу 60 университетке жөнөтүлгөн катында администрация эгер алар «антисемитизм» деп сыпаттаган акцияларды өткөрүүгө жол бербөөдө ийгиликсиз болсо, санкцияларды киргизе алары менен эскерткен.
Түндүк-Батыш университетинин өкүлү: «Түндүк-Батыш алган федералдык каржылоо дүйнөдөгү эң кичинекей кардиостимуляторду иштеп чыгуу жана альцгеймер оорусуна каршы күрөштү колдоо сыяктуу инновациялык жана адам өмүрүн сактап калуучу иштерди каржылайт. Мындай изилдөөлөр учурда коркунучта»,-деп билдирүү жасады.
Корнелл университетинин ректору Майкл Котликоф өткөн аптада New York Times гезитине макала жазып, анын университети Израил-Палестина жаңжалы сыяктуу сезимтал темаларды талкуулоого уруксат берүүдөн коркпой турганын айткан.
Трамптын администрациясы АКШнын өнөктөшү Израилдин Газадагы аракеттеринен кийин күчөгөн Палестинаны жактаган кампустагы нааразылык акцияларын басууга аракет кылууда. Демонстранттар жана айрым жөөт топтору Трамптын администрациясы Израилдин Газадагы операцияларын сынга алууларын жана Палестинанын укуктарын коргоону «антисемитизм» жана ХАМАСты колдоо менен адилетсиз байланыштырды дешет.
Трамптын университеттерге кысымы күчөдү
Трамптын администрациясы палестиналыктарды колдогон демонстрацияларды кампустарында өткөрүүгө уруксат берген америкалык университеттерди көбүрөөк бутага алууда. Бул абал Колумбия университетине каршы ушундай кадамдан кийин күч алды. Колумбиянын 400 миллион долларлык федералдык каржылоосу мурда ушул сыяктуу себептерден улам жокко чыгарылган. Бул куугунтуктан кийин Колумбия университети кампустун нааразылык саясаты менен катар саясатка кеңири өзгөртүүлөрдү жарыялаганы белгилүү.
Кийинчерээк администрация Гарвард университетин көздөп, антисемитизм боюнча иликтөө жүргүзүп, университеттин 9 миллиард долларлык федералдык каржылоосун алып салам деп коркуткан. Бул кадам университеттин Жакынкы Чыгышты изилдөө борборунун жетекчилерин кызматтан кетиргенден кийин жасалды, бул палестиналыктарды колдогон үндөрдөн жана бир жактуу айыптоодон алыс болуу аракети катары кабыл алынды.
Өткөн аптада Принстон университети да өкмөт ондогон изилдөө гранттарын тоңдурганын жарыялады.
Укук коргоочулар Трамп администрациясынын бул куугунтуктарынан улам сөз эркиндиги жана академиялык эркиндик боюнча олуттуу тынчсызданууларын билдиришти. Укук коргоочулар да Израилдин Газадагы операциялары учурунда күчөгөн «исламофобия жана арабдарга каршы» өңүттө Трамп администрациясынын эч кандай чара көрбөгөнүнө көңүл бурушууда.
