Курчоого алынган аймактын Өкмөт медиа кеңсесинин билдиргенине караганда Газада Израилдин 2023 - жылдын 7 - октярында баштаган геноцидден кийин өлтүрүлгөн журналист саны 232ге жетти.

Медиа кеңсеси берген маалыматта : “Газага карата геноцид согушу башталгандан бери өлтүрүлгөн журналист саны журналист Адем Абу Харбиддин өлтүрүлүшү менен 232ге жетти”,- деп айтылды.

Бирден көп медиа мекемеси менен иштешкен палестиналык фотокабарчы Абу Харбид Израилдин Газага абадан жасаган кол салуусунда каза болду.

Анадолу агенттигинин медициналык булактарынан алынган маалыматына караганда, Абу Харбид Ярмук базарына жакын жерде бир чатырды бутага алган Израиль тик учагынын кол салуусунда үч тууганы менен бирдикте өлтүрүлдү.

Кол салууда жубайы менен балдары да жаракат алды.

Медиа кеңсеси Израилдин “журналисттерди системалуу түрдө бутага алуусун” айыптап, эл аралык жана аймактык медиа уюмдарын каршылык көрсөтүүгө чакырды.

Билдирүүдө: «Бул ырайымсыз жана адамкерчиликсиз кылмыштар үчүн жоопкерчилик толугу менен Израилдин оккупациясына, АКШ администрациясына, Британия, Германия жана Франция сыяктуу геноцидге шериктеш болгон өлкөлөргө жүктөлөт»,-деп айтылат.

Ушул күнгө чейин Израиль Газада уланып жаткан кыргынында 59 миң 500дөн ашуун палестиналыкты өлтүрдү, алардын көбү аялдар жана балдардан турат.

Израилдин кол салуулары Газанын инфраструктурасы менен саламаттыкты сактоо системасын кыйратты жана бүткүл аймакта кеңири жайылган ачарчылыкка себеп болду.

Ноябрь айында Эл аралык кылмыш соту Израилдин премьер-министри Биньямин Нетаньяху менен мурдагы коргоо министри Йоав Галлантты согуштук жана адамзатка каршы кылмыштары үчүн камакка алууга ордер чыгарган.

Израилдин Газадагы согушу үчүн Эл аралык сотто да иш козголгон.