Украинанын президенти Владимир Зеленский президент Режеп Таййип Эрдоган менен жолугушуудан кийин бул демилгени толук колдоп, Түркиянын тынчтык сүйлөшүүлөрүнүн алкагында үч тараптуу лидерлердин саммитин өткөрүүсүнө Киевдин "ачык" экенин айтты.
БУУнун Башкы Ассамблеясындагы жолугушуулары учурунда Нью-Йорктогу Түрк үйүнөн чыгып бара жатып журналисттерге маалымат берген Зеленский Украина менен Түркиянын ортосундагы мамилелер "абдан бекем" экенин баса белгиледи.
Эрдоган менен жолугушуусун жемиштүү деп мүнөздөгөн Зеленский президент Эрдоган мамлекет башчыларынын деңгээлинде үч тараптуу жыйын өткөрүүгө даяр экенин ырастаганын айтты.
Зеленский: "Мен президентке эгер ал аны уюштура алса, Түркияда өткөрүү идеясын колдой турганыбызды айттым. Биз мындай саммитке келүүгө даярбыз", - деди.
Деңиз коопсуздугу
Украина лидери Эрдоган менен болгон жолугушуусунда Кара деңиздеги деңиз коопсуздугу, деңиздеги ок атышууну токтотуу же чыңалууну басаңдатуу келишиминин шарттары жана эл аралык азык-түлүк коопсуздугу коридорлору да талкууланганын маалымдады.
Зеленский: "Түркия Украинанын Кара деңиздеги абдан күчтүү өнөктөшү", - деди.
Эки өлкөнүн ортосундагы эркин соода келишимине токтолгон Зеленский Киев менен Анкара эки тараптуу соода көлөмүн 1 миллиард доллардан 10 миллиард долларга чейин көбөйтүүнү көздөп жатканын айтты.
Зеленский: "Өлкөлөрүбүздүн ортосундагы сооданы 1 миллиард доллардан 10 миллиард долларга чейин көбөйтүүнү чечтик. Биз ушул багытта бара жатабыз. Абдан жакшы натыйжаларга жетишип жатабыз", - деп билдирди.
