АКШнын соода өкүлү Жеймисон Грир Вашингтон Түштүк Африкага жана Руандага Африканын өсүшү жана мүмкүнчүлүктөрү жөнүндө мыйзамдын (AGOA) алкагында берилген АКШ рыногуна бажы төлөмсүз кирүү мүмкүнчүлүгүн токтото турууну пландап жатканын жарыялады.
Грир дүйшөмбү күнү: "Президент Трамп бул эки өлкө Африканын өсүшү жана мүмкүнчүлүктөрү жөнүндө мыйзамынын талаптарына туура келбеген иш-аракеттерди жасап жатканын аныктады", - деди.
AGOA укуктуу африкалык өлкөлөргө миңдеген товарлар үчүн АКШ рыногуна бажы төлөмсүз кирүү мүмкүнчүлүгүн берет. Түштүк Африка бул укуктан көп жылдар бою пайдаланып келет.
AGOAдан пайда көргөн өлкөлөр рынокко негизделген экономиканы сактоо, жакшы башкаруу принциптерин улантуу жана АКШнын инвестициялары менен соодасына тоскоолдуктарды жоюу сыяктуу талаптарга жооп бериши күтүлүүдө. Вашингтон администрациясы бул шарттардын аткарылып жатканын үзгүлтүксүз карап турат.
АКШ администрациясы Түштүк Африканы АКШнын президенти Дональд Трамптын "актарды куугунтуктоо" деп мүнөздөгөн айыптоолорунан улам бутага алды. Бирок Түштүк Африка өкмөтү муну маргиналдык топтор тараткан калп деп билдирүүдө.
Вашингтон Руандага байланыштуу болсо соода тоскоолдуктары, мыйзам үстөмдүгү жана адам укуктары боюнча олуттуу тынчсыздануулар бар экенин баса белгиледи.
