Эстониянын тышкы иштер министри Маргус Цахна улуттук коргонуу өнөр жайы компаниясы болгон Milrem Robotics объектисине болгон өрт коюу орус чалгын кызматтарынын буйругу менен жасалган саботаж экендигин айтты.
Тышкы иштер министри Цахна X социалдык тармагындагы баракчасынан бөлүшкөн билдирүүсүндө, борбор шаар Таллиндеги Milrem Robotics ишканасынын 15-август түнүндө өрттөлгөндүгүнө байланыштуу Ички коопсуздук кызматынын тыянактарын жарыялады.
Цахна өрт коюу орус чалгын кызматтарынын буйругу менен жасалган саботаж деген жыйынтыкка келишкенин билдирди.
Чабуулдун кабыл алынгыс экендигин айткан Цахна Эстониянын Тышкы иштер министрлиги бүгүн Таллиндеги Россиянын убактылуу өкүлүн чакырарын жарыялады.
Маргус Цахна өлкөсүнүн Украинага колдоосун жана Россияга болгон кысым көрсөтүүсүн күчөтөрүн билдирди.
Эстониянын Ички коопсуздук кызматынын жазуу жүзүндөгү билдирүүсүндө Эстонияда жайгашкан коргонуу өнөр жай компаниясы болгон Milrem Robotics объектисине өрт коюу ыкмасы Европада Россиянын атынан жасалган башка саботаждык аракеттерди чагылдырганы жана бул чабуул түздөн-түз Россияга байланыштуу болушу мүмкүн экени айтылды.
Билдирүүдө Украинада согуш башталгандан бери орус чалгын кызматтары коргонуу өнөр жай компанияларын, дрондордун технологиясына катышкан уюмдарды жана Украинаны колдогон мекемелерди атайын бутага алганы белгиленди.
НАТО: «Москванын гибриддик чабуулдары Украинага берген колдоону алсыратпайт”
НАТОнун башкы катчысы Марк Рютте Россиянын НАТО өлкөлөрүнө каршы гибриддик чабуулдары Украинаны колдоону алсыратпай турганын билдирди.
Рютте басма сөз жыйынында: "Россия НАТОнун мүчөлөрүнө каршы коркунучтуу жана душмандык аракеттерди улантууда. Алар биздин чечкиндүүлүгүбүздү алсыратууга жана Украинага берген жардамыбызды токтотууга аракет кылышууда. Бирок Россия тизгинделип жатат; биримдигибизди жана Украинага колдоо көрсөтүүбүздү бузууда ийгиликсиз болгондой эле, согуш талаасында да ийгиликсиздикке учурап жатат", - деди.
