Дүйшөмбү күнү Лондондо АКШ менен Кытайдын жогорку деңгээлдеги делегациялары дүйнөлүк экономикага терс таасирин тийгизген соода талашын жөнгө салуу максатында жолугушуу өткөрүшөт.
Вице-премьер-министр Хэ Лифэн жетектеген Кытай делегациясы шаардын белгисиз жеринде АКШнын соода министри Ховард Лутник, каржы министри Скотт Бессент жана соода өкүлү Джеймисон Гриер менен жолугушат.
Жолугушуу бир күнгө созулат деп пландалган.
Бул сүйлөшүүлөр өткөн айда Женевада болгон жолугушуулардын уландысы болуп саналат, анда соода согушунда убактылуу тыныгуу жарыяланган.
12-майда эки өлкө бири-бирине 100 пайыздан ашык тарифтерди киргизген соода согушун токтотуу үчүн 90 күндүк тыныгуу жөнүндө макулдашканын жарыялашкан.
Ошондон бери АКШ менен Кытай жасалма интеллектти иштеткен өнүккөн чиптер, автоунаа өндүрүшүндө маанилүү болгон “сейрек кездешүүчү металлдар” жана америкалык университеттерде окуган кытайлык студенттердин визалары боюнча кайым айтышууда.
Трамп-Си телефондук сүйлөшүүсү
Өткөн бейшемби күнү президент Дональд Трамп Кытай лидери Си Цзиньпин менен телефон аркылуу узак сүйлөшүү жүргүзүп, эки тараптуу мамилелерди кайрадан оңдоого аракет кылды.
Трамп кийинки күнү социалдык тармактар аркылуу дүйшөмбү күнү Лондондо соода сүйлөшүүлөрү өтөрүн жарыялады.
Улуу Британия өкмөтү жолугушуу үчүн жай жана логистикалык колдоо көрсөтүп жатканын, бирок сүйлөшүүлөргө катышпай турганын билдирди.
“Биз эркин сооданы колдогон өлкөбүз жана соода согушу эч кимге пайда алып келбейт деп дайыма айтып келгенбиз, ошондуктан бул сүйлөшүүлөрдү кубаттайбыз”, - деп айтылат британ өкмөтүнүн билдирүүсүндө.
