Бириккен Улуттар Уюмунун деңизчилик уюму болгон Эл аралык деңиз уюму шейшемби күндөн бери Ормуз кысыгынан 115 кеме менен 2500 деңизчинин эвакуацияланганын билдирди.
Уюмдун Башкы катчысы Арсенио Домингес жума күнкү билдирүүсүндө: "Акыркы үч жарым күндүн ичинде кеминде 115 кемени эвакуациялоого жетиштик. Бул кемелердеги 2500гө жакын деңизчи Ормуз кысыгынан коопсуз аймакка чыгып кетти", — деди.
Домингес берилген сандардын азырынча тактала электигин белгилеп, жума күнү эртең менен ишке ашкан өтмөктөрдү ырастоо үчүн убакыт керек экенин айтты.
Транспорт жана инфраструктура министри Абдулкадир Уралоглу аймакта күтүп жаткан түрк ээлигиндеги кемелердин бардыгы бошотулгандардын арасында экенин билдирди.
Абдулкадир Уралоглу жалпысынан 99 түрк кызматкерин ташыган 15 кеменин 26 - июнда аймактан коопсуз чыгып кеткенин билдирди.
Домингес бейшемби күнү бир кемеге жасалган кол салуудан улам токтотулган эвакуациялоо иштерин кайра баштоо үчүн аракеттер көрүлүп жатканын белгиледи.
Башкы катчы кемелердин бутага алынбай турганы жана соода агымы улана тургандыгы боюнча жаңы кепилдиктер алынары менен эвакуациялоо процессин кайра баштоого даяр экенин айтты.
Домингес Ирандын "уруксатсыз коридор" колдонулган учурда "укуктук санкциялар" колдонулары тууралуу билдирүүлөрдү жөнөткөнүн, бирок бул санкциялар эмнени түшүндөрөрүн билбей турганын кошумчалады.
Эл аралык деңиз уюму бейшемби күнү Оман булуңундагы кемеге кол салуудан кийин Ормуз кысыгында калган деңизчилерди эвакуациялоо планын токтотконун жарыялады.
Домингес бейшемби күнү Американын X социалдык медиа платформасы аркылуу: "Бүгүн Оман булуңундагы кол салуу тууралуу кабар билдирилди. Деңизчилердин коопсуздугу биздин эң башкы артыкчылыгыбыз", - деп билдирди.
Домингес координацияланган аракеттерди жана коопсуз навигацияны камсыз кылуу үчүн кошумча тактык берилгенге чейин эвакуациялоо планы токтотула турганын билдирди.
Бейшемби күнү эртең менен Улуу Британиянын деңиз соода операциялары борбору Оман жээгиндеги жүк ташуучу кеме белгисиз снаряд менен атылып, көпүрөгө зыян келтирилгенин билдирген. Окуяда каза болгондор жана жаракат алгандар, экологиялык зыян тууралуу маалымат берилген жок.
