АКШ президенти Дональд Трамп Куба Ирандан кийин АКШнын келечектеги аракеттеринин бутасы болушу мүмкүн экенин айтты.

Трамп АКШнын Венесуэла менен Ирандагы акыркы аскердик операцияларынын ийгилигин мисал келтирди.

Жума күнү Сауд Арабиядагы Future Investment Initiative бизнес конференциясында сөз сүйлөгөн Трамп: "Бул керемет армияны мен курдум. Колдонууга мажбур болбойсуңар дегемин бирок колдонууга мажбур болосуз. Эми кезекте Куба бар. Бирок мен муну айтпадым деп эсептегиле. Муну айтпадым деп эсептегиле. Суранам, суранам, суранам, суранам, маалымат каражаттары, бул билдирүүнү этибарга албагыла", - деди.

Кубанын тышкы иштер министринин орун басары жекшемби күнү берген маегинде өлкөнүн "АКШнын ыктымалдуу аскердик чабуулуна" даярданып жатканын айтты.

Карлос Фернандес де Коссио: "Армиябыз ар дайым даяр жана бул күндөрү ыктымалдуу (АКШ) аскердик чабуулга даярданып жатат. Дүйнөдө болуп жаткан окуяларга көз жумуу акмакчылык болот",- деди.

Кассио оккупация болбойт деген үмүтүн билдирип: "АКШ өкмөтү эмне үчүн өз өлкөсүн Куба сыяктуу кошунасына каршы аскердик аракеттерге мажбурласын?",- деген суроону узатты.

Шейшемби күнү АКШнын Мамлекеттик катчысы Марко Рубио Кубанын жетекчилиги өлкөдөгү электр энергиясынын өчүрүлүшү сыяктуу көйгөйлөрдү чече албай турганын жана жаңы лидерлерге муктаждык бар экенин айтып: "Кубанын иштебеген экономикасы жана аны оңдой албаган саясий-административдик системасы бар, ошондуктан алар түп тамырынан бери өзгөрүүлөрдү жасашы керек", —деди.

АКШ менен Куба 65 жылдан бери душман болуп келишкен; бирок, Трамп администрациясы Вашингтондон келген кысымды күчөтүүдө.