Ирандын коопсуздук боюнча жогорку кызматкерлеринин бири акыркы күндөрдө күч алган чыр-чатактан кийин АКШ менен болгон чыңалууну басаңдатууга багытталган сүйлөшүүлөрдө ийгиликтердин болгонун билдирди.
Ишемби күнү социалдык тармактарда билдирүү калтырган Ирандын Жогорку улуттук коопсуздук кеңешинин баш катчысы Али Ларижани, сүйлөшүүлөр боюнча «структуралаштырылган алкактын калыптана баштаганын жана алдыга жылып жатканын» айтты.
Ларижани «Медиадагы согуш риторикасы аркылуу түзүлгөн жасалма апыртмаларды» четке какты.
Бул билдирүүлөр, айрыкча Түркиянын жетекчилиги астында, Тегеран менен Вашингтондун ортосундагы чыңалууну басаңдатууга жана ортомчулук кылууга багытталган интенсивдүү дипломатиялык ишмердүүлүктүн алкагында айтылды.
Ирандын тышкы иштер министри Аббас Аракчи жума күнү Стамбулга келип, Режеп Таййип Эрдоган жана Түркиянын тышкы иштер министри Хакан Фидан менен жолугушту.
Ларижани болсо Москвага кыска мөөнөттүү сапар менен барып, Владимир Путин менен жабык эшик артында сүйлөшүүлөрдү өткөргөнү кабарланды. Жолугушуунун мазмуну ачыкталбаса да, аны Кремль тастыктады.
Өткөн айда Ирандагы нааразычылык акцияларынан кийин, Дональд Трамп нааразычылык акцияларына "жардам берерин" айткандан кийин, Иран менен АКШнын ортосундагы чыңалуу күчөдү.
Бул аптада Трамп АКШнын ири аскердик флоту Иранга бара жатканын жарыялап, Тегерандын дароо сүйлөшүүлөргө киришип, өзөктүк амбицияларынан баш тартышы керектигин эскертти.
Ирандык жетекчилер Аракчинин Стамбулдагы жолугушууларынан кийин баса белгилегендей «өз ара урмат - сыйдын» негизинде сүйлөшүүлөргө ачык экенин кайталашты.
Буга катарлаш, ирандык аскердик командирлер АКШ же Израилден келе турган ар кандай чабуулга катуу жооп кайтарыларын билдирип, куралдуу күчтөрдүн жогорку даярдыкта экендигин жарыялашты.
