Бириккен Араб Эмираттарынын (БАЭ) Flydubai авиакомпаниясы Дубай-Тель-Авив каттамын аткарган учак шашылыш сигнал жөнөткөндөн кийин Сауд Арабиясындагы Табук аэропортуна коопсуз конгонун жарыялады.
Авиакомпаниянын расмий веб-сайтындагы билдирүүсүндө Дубайдан Тель-Авивге жүргүзүлгөн"FZ1073" каттамы учурунда "окуя болгону" айтылды.
Билдирүүдө учак Табук аэропортуна коопсуз конгону жана бардык жүргүнчүлөрдүн абалы жакшы экени белгиленди.
Израилдик маалымат каражаттары Дубайдан Тель-Авивге багыт алган учак Иорданиянын аба мейкиндигинде учуп бара жатып, алгач "7700" жалпы шашылыш кодун, андан кийин "7500" кодун жөнөткөнүн билдиришкен.
Kanal 12 телеканалы окуя жүргүнчү учагын башкарган эки учкучтун мушташынан келип чыкканын кабарлаган.
Учкучтардын бири мушташуу учурунда эсин жоготкону жана бул учурда жаңылыштык менен шашылыш код жөнөтүлгөнү айтылган.
Басма сөздө учкучтардын бири Украинанын жараны, экинчиси Орусиянын жараны экени кабарланган.
Ошондой эле учкучтардын бири өз жанын кыюуга жана учакты кыйратууга аракет кылган деген дооматтар боюнча тергөө жүрүп жатканы жана израилдик жүргүнчүлөр мунун алдын алууга аракет кылганы да айтылды.
