Президент Режеп Таййип Эрдоган 30 жыл мурун "Шанхай бештиги" деген ат менен пайдубалы түптөлгөн Шанхай Кызматташтык Уюмунун (ШКУ) убакыттын өтүшү менен болжол менен 30 өлкөнү жана эл аралык уюмдарды бириктирген эң ири аймактык уюмга айланганын билдирди.

Президент Эрдоган Кыргызстан тарабынан Бишкекте өткөрүлгөн ШКУ саммитине катышкандан кийин Түркияга кайтып келе жатып учакта күн тартиби тууралуу баа берди.

Эрдоган: "Эң батыштагы азиялык жана эң чыгыштагы Европа өлкөсү" катары Түркия менен бирдей баалуулуктарды бөлүшкөн ар кандай демилгенин табигый бөлүгү болууну улантарын баса белгилеп: "Аймагыбызда болуп жаткан ар кандай чыр-чатактарды жана кризистерди эл аралык укукка негизделген диалог жана дипломатия аркылуу чечүү боюнча принциптүү позициябызды улантабыз",- деп кошумчалады.

Грециянын аскердик эмес аралдарын куралдандыруу боюнча журналисттин суроосуна жооп берген Эрдоган буларды айтты: "Биз Греция менен жакшы коңшулук негизинде бирге кадам таштайлы деп жатабыз. Конструктивдүү мамиле жасаган тарап болдук. Бирок көбүнчө ак ниетибиздин кадырына жете алышкан жок. Ошондуктан Греция эң оболу муну түшүнүшү керек: Түркия эч кимдин жерине көз артпайт, бирок эч кимге да өз укуктарын тебелетпейт. Эл аралык келишимдердин этибарга алынбашы жана алардын бузулушу эч кимге пайда алып келбейт. Түркиянын токтоо жана акылга сыярлык мамилесин кимдир бирөө алсыздык катары кабыл алып жаткан болсо, ачык айтайын, чоң ката кетирип жатат. Греция түшкөн бул туура эмес жолунан кайтып, аскердик эмес аралдарын куралдандыруудан баш тартышы керек. Тарых андан сабак алгандар үчүн абдан жакшы жол көрсөткүч. Биз аймагыбызда тынчтык, коопсуздук жана туруктуулук үчүн иштөөнү уланта беребиз".