Азербайжан бийлиги шейшемби күнү кечинде ок-дары кампасында чыккан өрттөн кийин 5000 адам эвакуацияланганын жана эч ким жабыркабаганын билдирди.

Өзгөчө кырдаалдар, коргоо жана ички иштер министрликтеринин биргелешкен билдирүүсүнө ылайык, өрт батыштагы Горанбой районунун Низами айылынын жанындагы кампада башталган.

Өзгөчө кырдаалдар жана коргоо министрликтеринин кызматкерлери полиция жана жергиликтүү бийлик органдары менен биргеликте чара көрүп, кырдаалды көзөмөлгө алышты.

Билдирүүдө жакын жерде жашаган тургундар сактык чарасы катары эвакуацияланганы белгиленди.

Горанбойдун губернаторунун орун басары Сеймур Назаров журналисттерге Низами жана коңшулаш Хойлу айылынын тургундары жакынкы аймактарга көчүрүлгөнүн айтты.

Өзгөчө кырдаалдар боюнча комиссияны жетектеген Назаров: "Эвакуацияланган адамдардын жалпы саны 5000ди түзөт", - деди.

Өрттүн дагы деле уланып жатканын жана кээде жарылуулардын үнү угулганын, бирок анын жайылышына жол бербөө жана өчүрүү боюнча аракеттер көрүлүп жатканын айтты.

Эч бир үйдүн зыян тартпаганын, жаракат алгандар же олуттуу жоготуулар катталбаганын кошумчалады.

Назаров эки айылдын тең кире беришинде жана чыга беришинде коопсуздук чаралары көрүлгөнүн жана эвакуациялангандар коопсуз шарттарда жайгаштырылып жатканын айтты.