АКШнын президенти Дональд Трамп жекшемби күнү Ооганстан менен Пакистандын ортосундагы соңку чыңалууну жөнгө салууга убада берип, согуштарды чечүүгө жакшымын деп билдирди.
Израилге сапарынын алдында Air Force One телеканалында журналисттерге маалымат берген Трамп : "Бул мен чечкен сегизинчи согуш болот жана менин укканыма караганда, азыр Пакистан менен Ооганстандын ортосунда согуш жүрүп жатат. Мен кайтып келгенче күтүшүм керек деп айттым. Мен азыр дагы бир согушту чечип жатам. Анткени мен согуштарды чечкенге жакшымын, мен муну тынчтык түзүү үчүн чечем жана мен үчүн сыймык. Миллиондогон адамдардын өмүрүн сактап калдым, миллиондогон өмүр»,-деп айтты.
Жекшембиде 2021-жылы талиптер Ооганстанды кайра басып алгандан берки эки тараптын ортосундагы эң кандуу кагылышууда бир түндүн ичинде ондогон аскерлер набыт болду. Бул маалыматты эки тарап тең ырасташты.
Эки өлкөнүн ортосундагы чыңалуунун күчөшү Ооганстандагы талиптердин убактылуу администрациясынын пакистандык аскерлер өлкөнүн аба мейкиндигин бузуп, Пакистан менен чектеш Пактика провинциясынын Марга районундагы базарды бейшембиге түнү бомбалады деген билдирүүсүнөн улам келип чыкты.
Дүйшөмбү күнү Трамп Израилге барып, израилдик туткундардын үй-бүлөлөрү менен жолугуп, Кнессетте (Израилдин парламентинде) сөз сүйлөйт деп күтүлүүдө.
Андан соң ал дүйшөмбү күнү дүйнө лидерлери менен бирге Шарм-эль-Шейх тынчтык саммитине катышуу үчүн Египеттин Шарм-эш-Шейх шаарына барат.
Каирдин айтымында, Трамп менен Египеттин президенти Абдель Фаттах ас-Сиси биргелешип төрагалык кыла турган саммит “Газадагы согушту токтотуу, Жакынкы Чыгышта тынчтык жана ырааттуулукка жетишүү үчүн аракеттерди күчөтүү жана аймактык коопсуздук менен ырааттуулуктун жаңы этабын баштоо” максатын көздөйт.
