Украинанын АКШдагы элчиси шаршемби күнү президент Дональд Трамптын Орусияга карата көптөн күткөн санкцияларын кубаттап, Москвага каршы күч көрсөтүү гана натыйжалуу болорун билдирди.
Элчи Ольга Стефанишина: «Бул чечим күч жана бардык эл аралык мыйзамдарды колдонуп агрессорго максималдуу кысым көрсөтүү менен гана тынчтыкка жетишүүгө болору темасындагы Украинанын ырааттуу позициясына толук шайкеш келет», - деди.
Еврокомиссиянын төрайымы Урсула фон дер Ляйен да шаршемби күнү АКШнын Каржы департаментинин Орусиянын ири мунай компанияларына санкция киргизүү чечимин кубаттады.
“Бүгүн кечинде @SecScottBessent менен болгон сүйлөшүүнү жана Каржы департаментинин Орусиянын тынчтык процессине берилгендигинин жоктугуна карата негизги мунай компанияларына санкция киргизүү чечимин жогору баалайм,”- деп жазды фон дер Ляйен X социалдык тармагында.
Ляйен ошондой эле АКШнын санкциялары Евробиримдиктин Орусияга каршы 19-санкциясынын кабыл алынышы менен бирге "Атлантиканын эки тарабынан тең жамааттык кысымдын агрессорго каршы улана береринин ачык белгиси" экенин айтты.
АКШ Москванын Украинадагы согушту токтотуу үчүн тынчтык жараянына "олуттуу ынтызар эместигин" айтып, шаршемби күнү Орусиянын эки ири мунай компаниясы Роснефть жана Лукойлга каршы жаңы санкцияларды киргизди.
Каржы департаменти билдирүүсүндө бул чаралар Орусиянын энергетика секторун бутага алып, “Кремлдин согуштук машинасы үчүн каражат чогултуу мүмкүнчүлүгүн азайтуу” жана “алсызданган экономикасын колдоо” максатын көздөгөнүн айтты.
НАТОнун баш катчысы Марк Рютте болсо шаршемби күнү Орусиянын президенти Владимир Путинди “туруктуу кысым” аркылуу ок атышууну токтотуу боюнча сүйлөшүүлөргө алып келүүгө болорун айтты.
АКШнын президенти Трамп менен Ак үйдө өткөргөн пресс-конференциядан кийин журналисттерге маалымат берген Рютте: «Дайыма кысым көрсөтүү менен Путинди үстөлгө отургузуп, ок атышууну токтотууга макул кыла аларыбызга толук ишенем, андан кийин дагы башка сүйлөшүүлөр болот»,-деди.
Рютте Трамп менен Орусия-Украина согушун кантип токтотууну, НАТО кандай салым кошо аларын жана Путинди ок атышпоо келишимин кабыл алууга көндүрүү үчүн кандай кадамдар таштала аларын сүйлөшкөнүн айтты. Ал АКШнын президентин "бул маселе боюнча күчтүү позициясынан жана көз карашынан" улам "Путин менен сүйлөшүп, анын эсептөөлөрүн өзгөртүүгө жана ага бир аз убакыт бере ала турган жалгыз адам" деп мүнөздөдү.
Рютте АКШнын Украина үчүн коопсуздук кепилдигине кайра киришүүсүнүн маанилүүлүгүн баса белгилеп АКШ, Канада, Жапония, Австралия жана тиешелүү Европа өлкөлөрү менен коопсуздук боюнча милдеттенмелеринин алкагында тыгыз кызматташтыгына көңүл бурду.
