Орусиянын Тергөө комитети жума күнү Москвада орусиялык жогорку даражалуу аскердик чалгын кызматкерине ок аткан кол салуучуну издөө иштери жүрүп жатканын кабарлады.

Комитеттин басма сөз катчысы Светлана Петренко генерал-лейтенант Владимир Алексеевге Москванын түндүк-батышындагы үйүнүн алдында бир нече жолу ок атылганын, андан кийин шектүү окуя болгон жерден качып кеткенин билдирди.

Орусиялык жетекчилер Алексеевдин жаракат алып албаганы же кол салуунун себеби тууралуу комментарий бере элек.

Алексеев 2011-жылдан бери өлкөнүн эң күчтүү жана жашыруун коопсуздук органдарынын бири болгон Орусиянын Башкы штабынын Башкы чалгындоо башкармалыгынын (ГРУ) башчысынын биринчи орун басары болуп иштеп келет.

Петренко Телеграмдагы билдирүүсүндө киши өлтүрүүгө аракет кылуу жана курал-жарак аткезчилиги боюнча кылмыш иши козголгонун айтты. "Учурда окуя болгон жерде тергөөчүлөр жана соттук-медициналык эксперттер иштеп жатышат, видеобайкоо тасмаларын карап чыгып, күбөлөрдү суракка алышууда" деп кошумчалап, күнөөлүүлөрдү аныктоо жана табуу иштери уланып жатканын маалымдады.

Бул кол салуу Орусиянын аймагында жогорку кызматтагы офицер бутага алынган биринчи окуя эмес.