АКШнын Мамлекеттик департаменти зарыл эмес кызматкерлерге Кувейт, Ирак, БАЭ, Катар, Бахрейн жана Иорданиядагы АКШ өкүлчүлүктөрүнөн чыгып кетүүнү буйруду. Мунун себеби катары Иран менен уланып жаткан аскердик жаңжалдын алкагында "куралдуу кагылышуу коркунучу" жана "коопсуздук маселелери" көрсөтүлдү.

Мамлекеттик департамент ошондой эле бул өлкөлөрдөгү АКШ жарандарын жергиликтүү маалымат каражаттарын жана АКШнын расмий эскертүүлөрүн көзөмөлдөө менен учурдагы окуяларды байкап турууну эскертти.

Шейшемби күнү эртең менен Кувейттеги АКШ элчилиги аймактык чыңалуулардын уланып жаткандыгына байланыштуу "кийинки билдирүүгө чейин жабык бойдон калаарын" жарыялаган.

Элчилик АКШнын X социалдык медиа компаниясы аркылуу: "Биз бардык пландаштырылган жана шашылыш консулдук жолугушууларды жокко чыгардык. Элчилик кадимки ишине кайтып келгенде маалымат беребиз", - деп кабарлады.

Багдад аэропортун колдонууга тыюу салынат

Ирак үчүн даярдалган саякат эскертүүсүндө Багдаддагы АКШнын өкүлчүлүгү ошондой эле Мамлекеттик департамент коопсуздук маселелеринен улам зарыл эмес мамлекеттик кызматкерлерге "Ирактан чыгып кетүү" буйругун бергенин билдирди.

«Коопсуздук маселелеринен улам Багдаддагы АКШнын өкмөттүк кызматкерлерине Багдад эл аралык аэропортун колдонууга тыюу салынат», - деп кошумчаланды.

Бул окуялар ишемби күнү Иранга каршы башталган АКШ менен Израилдин аскердик чабуулу учурунда Ирандын Жогорку лидери Али Хаменеи баштаган жогорку даражалуу чиновниктердин өлүмүнөн кийин болду.

Ал эми Тегеран Израилге жана АКШнын активдери жайгашкан бир нече аймактык өлкөлөргө каршы дрон жана ракеталык чабуулдар менен жооп кайтарды.