«Financial Times» гезитинин шаршемби күнү украиналык жана европалык расмий өкүлдөргө таянып жарыялаган кабарына ылайык, Украинанын президенти Владимир Зеленский президенттик шайлоо жана референдум өткөрүү планын 24-февралда жарыялоону көздөп жатат.
«Reuters» агенттиги өткөн аптада АКШ жана украиналык сүйлөшүүчүлөр тарабынан талкууланган алкактын негизинде, ар кандай тынчтык келишиминин референдум аркылуу украиналык шайлоочулардын кароосуна сунушталарын жана ошол эле учурда шайлоочулардын улуттук шайлоодо да добуш бере аларын билдирген. Агенттик өзгөчө расмий өкүлдөрдүн улуттук шайлоо жана референдумдун май айында өткөрүлүшү мүмкүн деген маселени талкуулап жатышканын кабарлаган.
Россия буга чейин эгер Киев шайлоо өткөрө турган болсо, коопсуздукту камсыздоого жана Украинанын аймагынын тереңдигине чабуул жасабоого убада берген. Россиянын президенти Владимир Путин өзгөчө Россияда жашаган Украинанын жарандары да добуш бере алышы керектигин белгилеген.
Украинанын президенти Владимир Зеленский ишемби күнкү билдирүүсүндө, АКШнын төрт жылга жакын убакыттан бери уланып жаткан Россия - Украина согушун "ушул жылдын жай мезгилинин башына чейин" аяктоону сунуштаганын айтты.
Январь айынын аягында Ак үйдө журналисттерге маалымат берген АКШ президенти Дональд Трамп, Зеленский менен Путиндин ортосундагы жеке жана саясий кастыктын кагылышууну токтотуу аракеттерин татаалдаштырып жатканын айткан. Трамп: «Зеленский менен Путин бири-бирин жек көрүшөт жана бул ишти абдан кыйындатууда. Бирок, менимче, биз келишимге жетишүүгө абдан жакындап баратабыз», — деген.
АКШнын президенти Дональд Трамп өткөн жылы бир нече жолу согушту токтотуу үчүн "акыркы мөөнөттөрдү" белгилеген, бирок алардын бири да жыйынтык берген эмес.
Акыркы жумаларда АКШнын ортомчулугунда Россия менен Украинанын өкүлдөрүнүн ортосунда өткөн сүйлөшүүлөр эки тараптын тең расмий өкүлдөрү тарабынан конструктивдүү жана позитивдүү деп мүнөздөлдү. Бирок, негизги маселелерде кандайдыр бир жылыш болгону тууралуу белгилер жок.
Зеленский бейшемби күнкү билдирүүсүндө тынчтык сүйлөшүүлөрү жакынкы арада уланарын айтты.
