Жай мезгилинин башталышы менен Түркияда токой өрттөрүнүн саны кескин көбөйүп, расмий маалыматтарга караганда 1-июндан бери 1 миң 516 өрт катталды.
Дүйшөмбү күнү X платформасында билдирүү жасаган президент Режеп Таййип Эрдоган, өрт өчүрүүчү топтор 27 учак, 105 тик учак жана 14 учкучсуз учуучу аппараттан турган аба флотунун жардамы менен күнү-түнү иштеп жатканын ырастады.
Өрттөрдү көзөмөлгө алуу үчүн 6,000ге жакын өрт өчүрүүчү унаалар жана биринчи жардам көрсөтүүчү транспорттор, ошондой эле 25,000 токой кызматкерлери мобилизацияланды.
Эрдоган “Ушул учурга чейин 1,507 өрт көзөмөлгө алынды. Учактарыбыз жана тик учактарыбыз жалпы 10 миң 260 ирет 33 миң 200 тонна суу таштады” - деп кошумчалады.
Ошондой эле, өрттөрдү чыгарышы мүмкүн деп шектелген 31 адамдын кармалганын билдирди. Алардын ону камакка алынып, он киши соттун көзөмөлү алдында тергөө аяктаганга чейин бошотулганын айтты.
Президент Эрдоган өрттөн жабыркаган жарандарга тилектештигин билдирип, токой өрттөрүнүн дээрлик бардыгы адамдын шалаакылыгы же атайын жасалган аракеттерден келип чыкканын эскертти.
“Мамлекетибиз албетте бардык чараларды көрүп жатат, бирок эң негизгиси өрттүн чыгышына жол бербөө экенин эскертип коеюн”,-деген Эрдоган жарандарды алдыдагы эки айда максималдуу этият болууга жана “Жашыл мекенди” коргоого чакырды.
