Лукашенконун алтынчы мөөнөткө шайланганын жарыялаган расмий жыйынтыктар митингчилердин "шайлоодогу бурмалоо" деп мүнөздөгөн абалга карата нааразычылык акцияларына жол ачкан. Россиянын лидери Владимир Путин Лукашенкону колдой турганын билдирсе батыштык өлкөлөр аны президент катары таануудан баш тартты. 1994-жылдан бери бийликте келе жаткан Лукашенко нааразычылык акцияларына миңдеген демонстрантты камакка алуу менен жооп берди.
Лукашенко АКШда жайгашкан Newsmax медиа компаниясына берген интервьюсунда жана шаршемби күнү жарыяланган билдирүүлөрүндө беларустар менен америкалыктардын келишим түзө ала турган"прагматист" элдер экенин билдирди.
Лукашенко буларды айтты: "Бул жерге келген кесиптештериңизге ачык айттым: мырзалар, жеңилүүнү кантип кабыл алууну билишиңер керек. Эгерде АКШ сыяктуу чоң өлкө 2020-жылы бизге каршы чабуул коюп, утулуп калган болсо, бул башталыш чекити".
Ал сөзүн: "Чыгып алып 'Утулдук' деп кыйкыруунун кереги жок, бирок баштапкы чекитибиз ушул болушу керек. Утулдук, бирок келгиле, эркекче жана сабырдуулук менен столго отуруп, жолубузду уланталы",- деп улады.
"Биз бир нерсени туура эмес кылдыкпы?"
АКШ жана башка батыш өлкөлөрү 2020-жылдагы шайлоолорго, адам укуктарынын бузулушуна байланыштуу айыптоолорго жана Лукашенконун Путинге 2022-жылы Украинага кол салуу үчүн Беларустун аймагын колдонууга уруксат бергенине байланыштуу Беларуска санкция киргизишкен.
Акыркы жылдары АКШнын элчилери мамилелерди жакшыртуу жана батыш "саясий туткундар" деп эсептеген активисттерди бошотууну камсыз кылуу үчүн Беларуска барышкан. Өткөн аптада Лукашенконун маегине катышкан АКШнын Беларустагы өкүлү Жон Коул өлкөдө камакта отурган 123 адамдын бошотулушун камсыз кылган келишимге ортомчулук кылган.
Лукашенконун Newsmax каналына берген жана Беларусь мамлекеттик BelTA маалымат агенттиги тарабынан да жарыяланган маегинде, өлкөсүнүн АКШ менен жакшы мамилелерди түзүүнү каалай турганы баса белгиленди.
Лукашенко төмөнкү суроолорду берген: "Эмне үчүн америкалыктар менен болгон мамилебиз начар? Биз АКШга кандайдыр бир жаман иш кылдыкпы? Эч нерсе. Анда эмне үчүн бизге мынчалык шектенүү менен карайсыңар?"
"Мен келечек муундарга көйгөйлөрдү калтыргым келбейт"
Өзүнүн жетекчилиги учурунда пайда болгон көйгөйлөрдүн келечек муунга өтүшүн каалабай турганын айткан Лукашенко, эки өлкөнүн Вашингтондун Венесуэла менен болгон пикир келишпестиктерин чечүү үчүн биргелешип иштей аларын билдирди. Венесуэла лидерлери менен болгон жакшы мамилелерине токтолгон Лукашенко: "Ал жерде чогуу иштей алабызбы? Ооба, иштей алабыз", - деди.
