Бельгиянын баш калаасы Брюсселдин борборунун айрым аймактарындагы коомдук жайларда алкоголдук ичимдиктерди ичүүгө тыюу салуу төрт жылга узартылды.
Өлкөнүн расмий маалымат агенттиги Belga билдиргендей, Брюссель шаардык кеңеши мурда жыл сайын жаңыртылып келген тыюу салуу эми төрт жылга күчүндө болот деп чечим чыгарды.
Тыюу салуу Брюсселдин борборундагы жөө жүргүнчү зоналары менен айрым көчөлөргө жана аянттарга тиешелүү.
Күнү-түнү күчүндө болгон тыюу салуу ресторан жана бар террасаларына, ошондой эле муниципалитет тарабынан уруксат берилген же уюштурулган коммерциялык, көңүл ачуучу жана спорттук иш-чараларга тиешелүү эмес.
Тыюу салуу эрежесин бузгандар 500 еврого чейин административдик айып пулга жыгылат.
Тыюу салуу 2020-жылы киргизилген.
Бул чара 2020-жылдын февраль айында шаардын борборундагы коопсуздук көйгөйлөрү жана мас адамдардын ызы-чуусу боюнча арыздардан кийин киргизилген.
Башында түн ортосунан таңкы сааттарга чейин күчүндө болгон тыюу салуу 2021-жылдын октябрь айында жаңы көчөлөрдү жана аянттарды камтуу менен кеңейтилип, анын мөөнөтү суткасына 24 саатка чейин узартылган.
Кийинки жылдары тыюу салуу шаардык кеңештин чечимдери менен жыл сайын узартылып турган.
