Сириянын тышкы иштер министри Асад Хасан Шейбани өлкөнүн Мекке биргелешкен коргонуу келишимине кошулуу маселеси талкууланып жатканын билдирип Түркия менен саясий, экономикалык жана аскердик байланыштар жогорку деңгээлде экенин белгиледи.
Шейбани Бахрейнде өткөн «Манама диалогу — 2026» форумунун «Аймактык коопсуздуктун негиздери» аттуу сессиясынын ачылышында сөз сүйлөдү.
Ал аймактык коопсуздуктун маанисине токтолуп, бүгүнкү күндө бир дагы өлкө өз коопсуздугун башкалардан бөлүп карай албасын айтты.
«Перс булуңунун коопсуздугу — Сириянын аймактык коопсуздугунун ажырагыс бөлүгү», — деди министр.
Шейбани Сирия чек арадан тышкары аракеттенген куралдуу топторго каршы күрөштө Перс булуңундагы өлкөлөрдү жана элин колдой турганын белгиледи. Ошондой эле Сириянын Мекке келишимине кошулуу маселеси боюнча сүйлөшүүлөр уланып жатканын айтты.
Аймактык кызматташтык тууралуу сөз кылган министр Түркия менен саясий, экономикалык жана аскердик байланыштардын жогорку деңгээлде экенин баса белгиледи.
«Сирия менен Түркиянын саясий, экономикалык жана аскердик мамилелери өзгөчө жогорку деңгээлде. Сириянын аскердик кызматташтыгы Түркия менен гана чектелбейт. Араб өлкөлөрү менен да аскердик жана коопсуздук тармактарында кызматташабыз», — деди Шейбани.
Сириядагы ички кырдаалга токтолгон Шейбани өлкөдө туруктуулукту калыбына келтирүү боюнча кадамдардын ташталып жатканын билдирди.
«3,7 миллиондон ашык сириялык өз үйлөрүнө кайтып келди. Бул — жаңы Сириянын жаралышынын ачык далили», — деди министр.
Түркиянын президенти Режеп Таййип Эрдоган, Пакистандын премьер-министри Мухаммед Шахбаз Шариф жана Сауд Арабиясынын мураскор ханзаадасы, премьер-министри Мухаммед бин Салман бин Абдулазиз Аль Сауд 7-августта Меккеде Биргелешкен коргонуу келишимине кол коюшкан.
Аймактык көйгөйлөргө аймактык чечимдерди табуу милдеттенмесин жана коопсуздук менен туруктуулукка багытталган жалпы стратегиялык көз карашты чагылдырган келишим үч өлкөнүн биргелешкен коргонуу жана бөгөт коюу мүмкүнчүлүктөрүн күчөтүү аркылуу коопсуздугун бекемдөөнү максат кылууда.
