Анкара Пакистан, Сауд Арабиясы, Египет жана Түркиянын ортосунда Жакынкы Чыгыштагы согуш тууралуу сүйлөшүүлөрдүн бул жуманын акырында Пакистанда өткөрүлөрүн билдирди.
Тышкы иштер министри Хакан Фидан А Хабер каналына берген маегинде: "Негизинен биздин пландаштырылган жолугушуубуз бар болчу, аны башында Түркияда өткөрүүнү ойлогонбуз.... Бирок пакистандык боордошторубуз өз өлкөсүндө калууга аргасыз болгондуктан, аны Пакистанга жылдырдык", - деп айтып, "Балким, дем алыш күндөрү ал жакта чогулабыз",- деп билдирди.
Тышкы иштер министринин айтымында, сүйлөшүүлөргө мусулман калкы көп төрт өлкөнүн тышкы иштер министрлери катышат.
Германиянын Тышкы иштер министри Йохан Вадефуль жума күнү эртең менен булагын ачыктабастан, Пакистанда АКШ менен Ирандын ортосунда түз сүйлөшүүлөрдүн "жакын арада" болорун күтүп жатканын белгилеген.
Тегеран Вашингтон менен расмий сүйлөшүүлөр жүрүп жатканын моюнга ала элек. Бирок Ирандын "Tasnim" маалымат агенттиги атын атабаган булакка таянып, Иран согушту токтотуу боюнча АКШ президенти Дональд Трамптын 15 беренеден турган планына карата жообун Исламабад аркылуу жеткиргенин кабарлады.
Бир тараптан Трамптын атайын өкүлү Стив Виткофф жума күнү жасаган билдирүүсүндө Ирандын Жакынкы Чыгышта бир айдан бери болуп келе жаткан согушту токтотуу үчүн “бул жумада” Вашингтон менен сүйлөшүүлөрдүн өткөрүлөрүнө ишенгенин, Майамидеги бизнес форумда Иран менен сүйлөшүүлөр тууралуу суроого: "Ушул аптада жолугушуулардын болорун ойлоп жатабыз жана үмүтүбүз бар”,- деп жооп берди.
Жогорку деңгээлдеги ирандык жетекчи жума күнү билдирүү жасап, АКШнын Иранга кол салуулары жана ошол эле учурда сүйлөшүүгө чакыруусу "кабыл алынгыс" экенин белгилеп, Тегеран өнөр жай жана өзөктүк инфраструктурага жасалган кол салуулардан улам АКШнын сунушуна жооп берер-бербесин азырынча чече электигин билдирди.
