Россиянын президенти Владимир Путин Украинанын Россияга каршы атомдук курал колдонушу Киевдин “акыркы катасы” болорун эскертти.

Жума күнү Санкт-Петербургдагы эл аралык экономикалык форумда сөз сүйлөгөн Путин эгер Украина Россиянын аймагына "ыплас бомба" таштоого аракет кыла турган болсо, Москванын да ушундай эле жол менен жооп кайтарарын айтты.

"Бул азыркы учурда Украинада иштеп жаткан неонацисттер деп аталган кишилердин абдан чоң жаңылыштыгы болот; балким, алардын акыркы катасы", - деди.

Путин Россиянын атомдук доктринасы бар болуу коркунучуна каршы катуу жооп кайтарууну болжолдой турганын баса белгилеп, Киев үчүн кесепеттери оор болорун эскертти.

«Биздин жообубуз неонацисттик режим үчүн да, Украинанын өзү үчүн да өтө катаал, балким кыйратуучу болот», - деди.

Бир тараптан Путин азыркы учурда Украинанын ыплаc бомба колдонууну пландап жаткандыгына байланыштуу далилдин жок экендигин кабыл алды.

"Кудайга шүгүр, бизде мындай ниетти далилдей турган эч кандай далил жок. Бирок, кимдир бирөөнүн оорулуу акылында ушундай ой пайда болушу мүмкүн деп болжоп жатабыз", - деди.

Россиянын президенти Владимир Путин Украинадан Россиянын аймагына кайталанган кол салуулардан жана акыркы Курск облусуна жасалган чабуулдан кийин Украинанын чек арасы боюнча "коопсуздук зонасын" түзүшкөнүн жарыялады.

Путин украин аскерлери Россиянын Курск аймагына “киргенин” жана “жай тургундарга каршы кылмыш жасаганын” билдирди.

Путин буга жооп катары орус аскерлеринин кол салуучуларды “олуттуу жоготууга учуратканын” жана аларды аймактан кууп чыкканын айтып, ошондуктан Москванын чек ара аймагын коргоо чечимин чыгаргандыгын кошумчалады.

Путин буфердик зонанын 8 километрден 12 километрге чейин ичкери кириши мүмкүн экенин жана бул зонанын ары жагында Украинанын түндүк-чыгышындагы Сумы облусунун борбору жайгашканын белгиледи.

"Бул аймактан ичкери кирүү болжол менен 10дон 12 километрге чейин — кээде 8, кээде 12 километр. Бул сызыктын ары жагында Сумы шаары жайгашкан. Аны басып алуу азыркы учурда биздин максатыбыз эмес, бирок бул ыктымалды четке какпайм," - деди.

Россия Украинага канчалык илгерилемекчи деген суроого Путин "орус жана украин элдерин бир улут деп эсептей турганын" айтып: "Бул жагынан алганда бүт Украина биздики",- деп жооп берди.

«Орус аскери бут баскан жер биздики»,- деди.

Украин өкмөтү Путиндин билдирүүлөрүнө азырынча жооп бере элек.

Согуштун төртүнчү жылында Россиянын аскердик чабуулу, өзгөчө Украинанын түндүк-чыгышындагы Харьковдун айланасында кайрадан күч алды. Кремль жетекчилери бул жетишкендиктерди Украинанын агрессиясына каршы коргонуу чаралары катары мүнөздөшүүдө.