Венесуэланын өкмөтү АКШнын акыркы апталардагы аскердик аракеттерин талкулоо үчүн Бириккен Улуттар Уюмунун Коопсуздук Кеңешинин чукул сессия өткөрүүсүн суранды.
Венесуэла бул өтүнүчүн бейшемби күнү Орусиянын БУУдагы элчиси жана Коопсуздук Кеңешинин төрагасы Василий Небензяга жазган катында билдирди. Катта АКШ президенти Дональд Трамптын администрациясы Венесуэла президенти Николас Мадурону бийликтен кулатууга аракет кылып, "регионалдык жана эл аралык тынчтыкка, коопсуздукка жана туруктуулукка коркунуч жаратууда" деп айыпталды.
Мадуронун өкмөтү ошондой эле "өтө кыска убакыттын ичинде" Венесуэлага каршы "куралдуу чабуул" болушу мүмкүн деп күтүп жатканын билдирди.
Бул өтүнүч Конгресс мүчөлөрү Трамптын баңгизат ташуучуларга каршы өлүмгө алып келүүчү аскердик күч колдонуу мүмкүнчүлүгүн чектөө боюнча мыйзам долбоорун четке каккан күндүн эртеси айтылды.
Ушул учурга чейин АКШ армиясы Кариб деңизинде төрт кол салуу жасады. Бул чабуулдар деңиз күчтөрүн көбөйткөндөн кийин Трамптын баңги картелдерине каршы жарыялаган “куралдуу кагылышынын” алкагында ишке ашырылды.
Бирок Мадуронун өкмөтү Ак үй баңгизат ташууну бул операция үчүн шылтоо катары колдонуп жатат деп эсептейт.
Венесуэланын БУУдагы элчиси Самуэль Монкада катта "АКШнын Венесуэлага карата 26 жылдан ашуун убакыттан бери жүргүзүп келе жаткан аракеттеринин негизги максаты өзгөргөн жок: Венесуэла аймагындагы бай жаратылыш ресурстарын көзөмөлгө алуу үчүн 'режимди алмаштыруу' саясатын алдыга жылдырууну көздөйт," деп жазды.
Чыңалуулар
Венесуэланын өтүнүчүндө АКШнын баңгизат ташып бара жаткан деп айтылган кемелерге жасаган төрт чабуулунда каза болгон 21 адам жөнүндө сөз козголгон эмес.
Трамптын администрациясынын маалыматына караганда, бул кемелердин үчөө Венесуэладан деңизге чыккан.
Орусия Венесуэланын көптөн берки өнөктөшү.
Мадуронун чакыруусу менен миңдеген венесуэлалыктар өлкөнүн коргонуу күчтөрүн чыңдоо үчүн жарандык согушкерлерге кошулушту.
Каракас менен Вашингтон 2019-жылы дипломатиялык байланыштарын үзгөн.
