Түркия Республикасы менен Улуу Британия эки тараптуу карым - катнаштарды мындан ары өнүктүрүү жана тыгыз диалог аркылуу кызматташтыкты кеңейтүү үчүн жаңы негиз түзгөн «Стратегиялык өнөктөштүктүн алкактык документине» кол коюшту.
Тышкы иштер министрлигинин бейшемби күнү X аркылуу бөлүшкөн билдирүүсүнө ылайык, документ Тышкы иштер министри Хакан Фидан менен Улуу Британиянын тышкы иштер министри Иветт Купердин Лондондогу жолугушуусунда кол коюлду.
Тышкы иштер министрлигинин расмий сайтында жарыяланган биргелешкен билдирүүдө алкактык документ коопсуздук жана климаттын өзгөрүшүнөн баштап, адамзаттын өнүгүүсүнө жана илим менен технологияга чейинки кеңири чөйрөлөрдү камтыганы белгиленди.
Маалыматка ылайык, документ НАТОнун эки өнөктөшүнүн ортосундагы учурдагы стратегиялык өнөктөштүктү мындан ары бекемдөөгө, эки тараптуу жана көп тараптуу деңгээлдерде тыгыз диалог аркылуу өнүккөн кызматташтыктын көлөмүн кеңейтүүнү максат кылганы билдирилди.
НАТО жана глобалдык коопсуздукка басым жасалды
Билдирүүдө сөзү болуп жаткан алкактын: “Жакынкы Чыгыштагы коопсуздук жана туруктуулукка болгон күчтүү каалоолору менен бирге көптөгөн эл аралык маселелерде жана глобалдык чакырыктарда жалпы көз караштарды бөлүшкөн, тарыхый достукка, мыкты эки тараптуу карым - катнаштарга жана НАТОдогу союздаштык менен стратегиялык өнөктөштүккө негизделген эки өлкөнүн ортосундагы диалогду жана кызматташтыкты чыңдоо үчүн бекем негиз түзөрү» белгиленди.
Мындан тышкары, эл аралык тартиптин чачыранды жана көп уюлдуу түзүлүшкө карай тездик менен өзгөрүшү Түркия үчүн да, Улуу Британия үчүн да тобокелдиктерди арттырып жатканына көңүл бурулду. НАТОнун Стратегиялык концепциясынын алкагында Евро-Атлантикалык коопсуздукту камсыз кылууда токтотуп туруу жана коргонуунун мааниси сакталып жатканы баса белгиленди.
Коопсуздук, экономика жана глобалдык чакырыктар боюнча кызматташтык
Алкактык документ глобалдык коопсуздук, НАТОдогу координация, коргонуу жана өнөр жай кызматташтыгы, терроризмге каршы күрөшүү жана гуманитардык жардам иштерин камтыган кеңири чөйрөдө Улуу Британия менен Түркиянын кызматташтыгын тереңдетүүнү көздөйт. Мындан тышкары, климаттын өзгөрүшү, энергетикалык коопсуздук, ошондой эле илим, технология жана инновация тармактарындагы өнөктөштүктү кеңейтүүнү карайт.
Биргелешкен билдирүүдө бул Алкактык келишим жалпы экономикалык өсүштү колдоого багытталган «заманбапташтырылган Эркин соода келишими» боюнча сүйлөшүүлөр менен бирге «эки тараптуу сооданы жана инвестицияны көбөйтүү ниетин кайрадан тастыктаганы» белгиленди.
Билдирүүдө: «Бүгүн Лондондогу сүйлөшүүлөр Улуу Британия менен Түркиянын ортосундагы карым - катнаштардын күчтүү экономикалык жана өсүш байланыштарына, Евро-Атлантикалык коопсуздукту коргоо боюнча жалпы милдеттенмелерге жана өз ара түшүнүшүүнү, ошондой эле ак ниетти чыңдоону уланткан туруктуу элдер аралык байланыштарга негизделгенин көрсөтүп турат», — деп айтылды.
