Киевдин маалыматына караганда, Орусия Украина менен үч жылдан бери уланып жаткан согушунда өлкөнүн батыш бөлүгүн бутага алган эң ири ракета жана дрон чабуулун жасады.
Шаршемби күнү Украинанын Аскердик Аба күчтөрү Орусия тарабынан сокку урууда колдонулган 728 дрондун 711ине бөгөт коюлуп, 13 ракетанын кеминде 7си жок кылынганын жарыялады.
“Бул чабуул тынчтыкты орнотуу жана ок атышууну токтотуу боюнча көптөгөн аракеттер жүрүп жаткан учурда болуп жатат. Бирок Орусия алардын баарын четке кагууну улантууда,” - деп жазды Украинанын лидери Владимир Зеленский социалдык тармактарда.
Зеленский союздаштарын Орусияга каршы санкцияларды күчөтүүгө, өзгөчө Орусиянын согуштук бюджетинин негизги киреше булагы болгон энергетика тармагын бутага алууга чакырды.
“Биздин өнөктөштөр Орусияны жаңы чабуулдарды баштоо эмес, согушту токтотуу жөнүндө ойлонууга мажбурлай тургандай кысымды кантип колдонуу керектигин билишет” - деп кошумчалады Зеленский.
Украинанын батышындагы Луцк шаарынын мэри Игорь Полищук "бир ишканадан" өрт чыкканын, жабыркагандар жок экенин билдирди.
Орусия ушул айдын башындагы кол салуусун 550 дрон жана ракета менен ишке ашырган. Соңку чабуулунда болсо андан көп колдонулду.
Бул чабуул АКШнын Украинага курал-жарак жеткирүүнү кыскартуу боюнча жарыяланган чечиминен баш тарткандан кийин болду.
“АКШ бизге курал-жарак берерин ачык жарыялагандан кийин Орусиянын бул чабуулду жасаганы абдан маанилүү белги,” - деп жазды Украинанын Башкы штабынын төрагасы Андрей Ермак социалдык тармактарда.
