АКШнын мурдагы президенти Жо Байден Газа боюнча ок атышууну токтотуу келишимине байланыштуу президент Дональд Трампты мактады.
Байден шейшемби күнү X платформасында “Бул келишимге жетүү оңой болгон жок. Менин администрациям туткундарды үйүнө кайтаруу, палестиналык жарандарга жардам берүү жана согушту токтотуу үчүн тынымсыз иштеди”, - деп билдирди.
“Мен президент Трампты жана анын командасын ок атышууну токтотуу келишимин ийгиликтүү аяктаганы үчүн куттуктайм”, - деп кошумчалады.
Fox News маалыматына ылайык, мурдагы президент Жо Байден жана мурдагы мамлекеттик катчы Энтони Блинкен дүйшөмбү күнү Трамптын Газада атышууну токтотуу келишимине байланыштуу өз салымдарын белгилешти.
Дүйшөмбү күнү Блинкен Трамптын Газа боюнча 20 пункттан турган тынчтык планы Байден администрациясы тарабынан иштелип чыккан планга негизделгенин айтты.
Телеканал Блинкендин Трамптын тынчтык келишимин кантип камсыз кылганын X платформасындагы узун постто кеңири айтып бергенин маалымдады.
"Ошондой эле мен президент Трампты согуштун башталышында Газа үчүн койгон негизги принциптерибизди (терроризмге орун жок, аннексия жок, басып алуу жок, калкты мажбурлап көчүрүү жок) ырастаганы жана акыркы максат Палестина мамлекетине ишенимдүү жол шарттарын түзүү экенин ачык айтканы үчүн куттуктайм", - деп билдирди Блинкен X платформасында.
Fox News телеканалынын маалыматына ылайык, Блинкендин посту тууралуу суроого Трамп: "Бул тамаша экенин баары билет. Карагылачы, алар коркунучтуу иш кылышты. Бул эч качан болбошу керек болчу" деп жооп берди. "Эгерде мендей жакшы президент эмес, компетенттүү президент болгондо, Орусия-Украина (согуш) болмок эмес" деген Трамп, "Бул Байден менен Обаманын жаман саясаты болчу" деп кошумчалады.
