АКШнын президенти Дональд Трамп Украина менен Орусиянын ушул аптада согушту токтотуу боюнча макулдашууга жетишээрине үмүттөнөрүн билдирди.
"ОРУСИЯ МЕНЕН УКРАИНА УШУЛ ЖУМАДА КЕЛИШИМ ТҮЗҮШӨТ деп үмүттөнөм", - деди Трамп жекшемби күнү Truth Social баракчасында.
“АНДАН СОҢ ЭКӨӨ АКШ МЕНЕН ЧОҢ БИЗНЕС КЫЛЫП, ӨЗДӨРҮНӨ ЧОҢ КИРЕШЕ ТАБЫШАТ!” – деп кошумчалады.
Анын бул сөздөрү Украинанын президенти Владимир Зеленскийдин жарандык инфраструктурага чабуулдарды 30 күнгө токтотуу сунушунан кийин айтылды.
Зеленский X платформасында “Украина, жарандык инфраструктурага карай алыс аралыкка учуучу дрондор жана ракеталар менен чабуулдарды 30 күнгө токтотууну сунуштайт,” – деп билдирди.
Эгер Орусия бул сунушту четке какса, мунун согуштун уланышын каалап жатканынын далили болорун айтты.
Кремль буга чейин орус президенти Владимир Путиндин, Пасха майрамындагы ок атышпоонун мөөнөтүн узартууга буйрук бербегенин жарыялаган.
Сынап көрүү
Ишемби күнү Путин Украинадагы согушта 30 сааттык бир тараптуу ок атышпоону жарыялап, анын ийгилиги же ийгиликсиздиги Киевдин тынчтыкка жетүү ниетин көрсөтөт деп белгилеген.
Буга жооп катары Зеленский анын өлкөсү Орусиянын аракеттерин кайталай турганын, эгерде толук ок атышпоо камсыздалса, анда бул тыныгууну узартууну сунуштай турганын айтты.
Бирок андан соң ал Орусиянын Курск жана Белгород чек ара аймактарында согуш аракеттери улантылып жатканын билдирди.
Трамп быйыл январда президенттик кызматка киришкенден бери АКШ, согушту токтотуу үчүн Украина жана Орусия менен дипломатиялык сүйлөшүүлөрдү активдүү жүргүзүп келет.
