CENTCOM: Иранга кол салуулар башталгандан бери алты америкалык аскер каза болду
CENTCOM каза тапкандардын өздүктөрү алардын үй-бүлөлөрүнө кабарлангандан кийин 24 сааттын ичинде жарыяланаарын билдирди.
АКШнын Борбордук командирлиги (CENTCOM) АКШ менен Израилдин Иранга биргелешкен чабуулдары учурунда дагы эки аскердин сөөгү табылганын маалымдады.
Дүйшөмбү күнү X баракчасында жарыяланган билдирүүсүндө CENTCOM: "2-мартта саат 16:00гө карата (21:00 GMT) алты америкалык аскер салгылашууда каза болду. АКШнын күчтөрү Ирандын аймактагы алгачкы чабуулдары учурунда сокку урулган объектте мурда дайынсыз жоголгон деп кабарланган эки аскердин сөөгүн табышты", - деди.
CENTCOM ошондой эле "ири масштабдуу согуштук операциялар" уланып жатканын жана аскерлердин ким экендиги алардын үй-бүлөлөрүнө кабарлангандан кийин 24 сааттын ичинде жарыяланаарын билдирди.
Дүйшөмбү күнү CENTCOM Ирандын алгачкы чабуулдарында оор жаракат алган бир аскерден кийин төрт америкалык аскердин өлүмүн жарыялаган.
Америкалык CBS News телеканалы АКШнын расмий өкүлүнө жана темадан кабардар булакка шилтеме кылып, дем алыш күндөрү Иран тарабынан жасалган ошол эле жооп чабуулунун натыйжасында Кувейтте дагы алты аскердин каза болгонун кабарлады.
Мурунку маалыматтарда ишемби күнү АКШ менен Израилдин Иранга каршы биргелешкен чабуулдары башталгандан бери 18 америкалык жоокер жарадар болгону айтылган.
Ишемби күнү эртең менен АКШ менен Израиль Иранга каршы биргелешкен чабуул жасап, Ирандын Жогорку лидери Али Хаменеи баштаган көптөгөн жогорку даражалуу чиновниктер каза болгон. Тегеран болсо Перс булуңунун бир нече өлкөлөрүнө, негизинен аймактагы АКШнын аскердик базаларына учкучсуз аппараттар жана ракеталык чабуулдар менен жооп кайтарган.