АКШ президенти Дональд Трамп Израилдин Ирандын жогорку лидери Аятолла Али Хаменейди өлтүрүү планына каршы чыгып, бул аракетке вето койгонун АКШнын жогорку даражалуу кызматкери AFP агенттигине билдирди.
«Биз Израилдин Ирандын жогорку лидерине кол салуу планы бар экенин билдик. Президент Трамп буга каршы болду жана биз израилдиктерге мындай кылбоону айттык», – деп АКШнын атын атагысы келбеген кызматкери жекшемби күнү билдирди.
Буга чейин Израилдин премьер-министри Биньямин Нетаньяху Трамптын өлкөсүнө Хаменейди өлтүрбөө тууралуу өтүнүчү боюнча суроого жооп берүүдөн баш тарткан.
«Мен бул тууралуу комментарий бербейм», – деп ал Fox News телеканалына айтты.
«Бирок мен айта алам, биз эмне кылышыбыз керек болсо ошону кылабыз. Менимче АКШ өз кызыкчылыгы үчүн эмне жакшы экенин билет», – деп кошумчалады ал.
Бул билдирүүлөр жекшемби күнү Израиль менен Иран бири-бирине ракеталык соккуларды уруп жаткан учурда айтылды. Кудста жарылуу үндөрү угулуп, тургундар баш калкалоочу жайларга кирүүгө чакырылган, ал эми Тегеранда абадан коргонуу системалары ишке киргизилгени кабарланды.
Көп жылдык кастык жана көмүскө согуштан кийин, бул акыркы кагылышуу эки өлкөнүн мындай деңгээлде ачык кармашуусу менен айырмаланды. Бул Жакынкы Чыгышты толук камтышы мүмкүн болгон узакка созулган жаңжалдан кооптонууга түрткү берди.
Жума күнү Израиль Ирандын аскердик командирлерин жана өзөктүк окумуштууларын өлтүрүп, аскердик базаларга, ядролук объектилерге жана турак жай аймактарына сокку урган чабуулунан кийин жаңжал башталган.
Тель-Авивдин чабуулу Ирандын Израилге каршы жооп кайтаруучу соккуларын пайда кылды. Ошондон бери чабуулдар жана аткылоолор токтобой уланууда.
Нетаньяху Fox News телеканалына Израиль Ирандын чалгындоо башчысы Мухаммед Каземини өлтүргөнүн кыйытты. Ал Израиль учактары Тегеранга чабуул жасаган учурда «чалгындоо башчысын жана анын орун басарын жок кылдык» деп билдирди.
Трамп Вашингтон, Израилдин жакын союздашы катары, Израилдин бомбалоо кампаниясына «эч кандай тиешеси жок» экенин айтты.
АКШ президенти жекшемби күнү ABC News телеканалына берген маегинде Америка Кошмо Штаттары «азыркы учурда» аскердик аракеттерге катышпаганын баса белгиледи.
Ошондой эле ал бул жаңжалды чечүү үчүн Орусиянын президенти Владимир Путиндин ортомчу болуу сунушуна «ачык» экенин билдирди.
