Иран беш күндөн бери күчөп бараткан жаңжалда «деэскалацияга» чакырып, Чоң жетилик (G7) өлкөлөрүн Израиль тарапты жактаганы менен айыптады.

Тышкы иштер министрлигинин басма сөз катчысы Исмаил Бекаи шейшемби күнкү билдирүүсүндө: «Чоң жетилик бир тараптуу риторикасынан баш тартып, чыңалуунун чыныгы булагы болгон Израилдин агрессиясына көңүл бурушу керек»,-деди.

«Израиль Бириккен Улуттар Уюмунун Уставын бузуу менен Иранга каршы эч кандай себепсиз агрессиячыл согушту баштады», — деп билдирди басма сөз катчысы. «Жүздөгөн бейкүнөө адамдар өлтүрүлдү, биздин коомдук жана мамлекеттик объектилерибиз жана адамдардын үйлөрү мыкаачылык менен талкаланды. Иран ырайымсыз кол салуудан өзүн коргоп жатат. Ирандын чындап эле башка тандоосу барбы?»-деп сурады ал.

Дүйшөмбү күнү Канадада өткөн G7 саммитинде лидерлер, анын ичинде АКШ президенти Дональд Трамп, «чыңалууну азайтууга» чакырып, Израиль өзүн коргоого укуктуу экенин баса белгилешти.

Акыркы билдирүүсүндө G7 лидерлери Жакынкы Чыгышта «тынчтык жана стабилдүүлүктү» жактай турганын айтышты.

«Израилдин өзүн коргоого укугу бар экенин ырастайбыз. Израилдин коопсуздугун колдой турганыбызды дагы бир жолу билдиребиз», — деп айтылат билдирүүдө. 

Муну менен катар, «Иран аймактык туруксуздуктун жана террордун негизги булагы», - деп кошумчаланган билдирүүдө, «Биз Иран эч качан өзөктүк куралга ээ болбой турганын ачык жана ырааттуу айттык. Биз Иран кризисинин чечилиши Жакынкы Чыгыштагы согуштук аракеттердин кеңири кыскарышына алып келишин абдан каалайбыз»,делди.