Сауд Арабиянын коргоо министри ханзаада Халид бин Салман Иран менен АКШнын ортосунда дем алыш күндөрү өткөрүлө турган Ирандын өзөктүк программасы боюнча сүйлөшүүлөрдүн алдында жетекчилер менен жолугушуу үчүн Тегеранга барды.
Коргоо министри бейшемби күнү Сауд Арабиянын падышасы Салман бин Абдулазиздин катын Ирандын жогорку лидери Али Хаманеиге тапшырды. Ирандын мамлекеттик маалымат каражаттары каттын мазмуну тууралуу кенен маалымат берген жок.
Ханзаада Халид X социалдык тармагындагы баракчасында: "Биз эки тараптуу мамилелерибизди жана орток кызыкчылыктарыбызды талкууладык" деп жазды.
Али Хаманеи да X аккаунтунда жолугушуу болгонун тастыктады, бирок каттын мазмуну тууралуу маалымат берген жок.
Ханзаада Халид Ирандын президенти Масуд Пезешкиан менен да жолугушту. Жолугушууда Сауд Арабия-Иран алакалары каралып, бул карым-катнаштарды кантип бекемдөөгө болору талкууланды.
Халид: "Биз ошондой эле аймактык жана эл аралык маселелерди жана тиешелүү аракеттерди талкууладык", - деп кошумчалады.
Римде Иран-АКШ сүйлөшүүлөрү
Иран менен АКШ дем алыш күндөрү Тегерандын талаштуу уран байытуу программасы боюнча экинчи айлампа сүйлөшүүлөрүн Римде өткөрүүгө даярданууда.
Ирандын мамлекеттик маалымат каражаттарына караганда Хаманеи жолугушуу учурунда "Иран Ислам Республикасы менен Сауд Арабиянын ортосундагы мамилелер эки өлкө үчүн тең пайдалуу деп эсептейбиз", - деди.
Хаманеи Тегерандын Эр-Рияд менен мамилени өнүктүрүүдөгү тоскоолдуктарды жеңүүгө даяр экенин баса белгиледи.
Иран менен Сауд Арабия 2023-жылы Кытайдын ортомчулугу менен жетишилген келишимдин негизинде көп жылдык кастыкты токтотуп, мамилелерди кайра калыбына келтирүүгө макулдашкан.
Сауд Арабия Ирандын АКШ менен өзөктүк сүйлөшүүлөрүн кубаттап, аймактык жана эл аралык талаш-тартыштарды чечүү аракеттерин колдой турганын жарыялады.
Ирандын башкы штабынын башчысы Мохаммад Бакери Тегеранда Сауд министри менен жолугушуудан кийин: "Пекин келишиминен бери Саудия менен Ирандын куралдуу күчтөрүнүн ортосундагы байланыштар жакшырды", - деп билдирди.
Аймактык коопсуздуктун “жалпы стратегиялык кызыкчылык” экенин баса белгилеген Бакери, Тегерандын саясаты коңшулары менен мамилени бекемдөөгө негизделгенин айтты.
IRNA агенттигинин маалыматына караганда Бакери: "Ошондуктан, эки өлкөнүн куралдуу күчтөрүнүн ортосундагы байланыштарды кеңейтүү жана чыңдоо аймактык кызматташтык үчүн бекем негизди түзө алат", - деди.
