2025-жылдын октябрь айынан бери күчүндө болгон ок атышууну токтотуунун тынымсыз бузулушунан улам Израилдин Газанын бир нече аймактарына жасаган чабуулдарынан кеминде 11 палестиналык каза болуп, көптөгөн адамдар жаракат алды.
Газанын Ички иштер министрлиги жума күнү жасаган билдирүүсүндө Израилдин Газанын түштүгүндөгү Хан Юнуста бир полиция унаасына жасаган кол салуусунда жети адам – эки полиция кызматкери, эки полиция жардамчысы жана үч жарандын каза болгонун жарыялады.
Саламаттыкты сактоо булактары "Анадолу" агенттигине (AA) билдиргендей, Газанын түндүгүндөгү Бейт Лахиядагы Камал Адван ооруканасына жакын үйлөргө жасалган кол салууда бир аял жана бир бала каза болуп, алты киши да жаракат алган.
Министрликтин маалыматы боюнча, Газа шаарындагы Шейх Радван полиция бөлүмүнө жакын полиция патрулун бутага алган Израиль кол салууларында эки палестиналык полиция кызматкери каза болуп, экөө жарадар болгон.
Министрлик башка бир билдирүүсүндө жарандык полиция кызматкеринин бутага алынышына байланыштуу Эл аралык Кызыл Крест Комитети баштаган эл аралык уюмдардын "унчукпастыгын" айыптады
«Эч кандай негиз жок»
Министрлик кол салууларды «эл аралык укук менен корголгон жарандык мекемеге каршы кылмыштуу аракет" деп билдирип, Газа элине негизги кызмат көрсөткөн полиция күчтөрүн бутага алууга эч кандай негиз жок экенин баса белгиледи.
Саламаттыкты сактоо булактары жана күбөлөрдүн айтымында, кол салуулар Израиль армиясы ок атышууну токтотуу келишиминин алкагында жайгаштырылган аймактардан тышкары аймактарга багытталган.
Бул окуялар 72 миңден ашуун палестиналыктын өмүрүн алган согуштан кийин, 2025-жылдын октябрында түзүлгөн ок атышууну токтотуу келишими Израиль тараптан бузулуп жаткан учурда болууда.
Газа өкмөтүнүн маалымат кеңсеси 14-апрелде Израиль келишимди киши өлтүрүү, камакка алуу, блокада жана ачка калтыруу саясаты аркылуу жалпысынан 2 400 жолу бузганын жарыялаган.
Газанын Саламаттыкты сактоо министрлигинин маалыматы боюнча, уланып жаткан эреже бузуулар 972 палестиналыктын өлүмүнө жана 2235 адамдын жаракат алышына алып келген.
