Израиль менен Ирандын ортосундагы чыңалууну басаңдатуу үчүн жогорку деңгээлдеги дипломатиялык аракеттер жума күнү Женевада башталат. Бул эл аралык чоң жыйын Жакынкы Чыгышта кеңири масштабдуу жаңжалды алдын алуу үчүн дүйнөлүк державалардын аракеттеринин алкагында өтөт.
Жыйындын алкагында эки жумага созулган сүйлөшүүлөр башталып, чыңалууну тынчтык жолу менен чечүү мүмкүнчүлүктөрүнүн каралары күтүлүүдө.
Улуу Британия, Франция жана Германиянын жогорку даражалуу дипломаттары Ирандын тышкы иштер министри Аббас Арагчи менен жолугушуп, Тегерандын ядролук программасын жана ыктымалдуу кагылышуу жолдорун талкуулашат. Ошондой эле Европа Биримдигинин тышкы саясат боюнча жетекчиси Кая Калластын да катышары күтүлүүдө.
Женевадагы жыйын аймактын ачык кагылышуунун босогосунда экендигине байланыштуу тынчсыздануулар күчөгөн учурда өтүүдө. Расмий өкүлдөрдүн айтымында, бул сүйлөшүүлөр келерки аптада Гаагада өтө турган НАТО лидерлеринин саммитинин алдында дипломатиялык дем берүү максатын көздөйт. Саммитте Жакынкы Чыгыштагы коопсуздук маселелери талкууланат.
Улуу Британиянын тышкы иштер министри Дэвид Ламми X платформасындагы билдирүүсүндө: “Жакынкы Чыгыштагы кырдаал кооптуу бойдон калууда. Биз Ирандын ядролук куралга ээ болушуна жол бербөө үчүн чечкиндүүбүз,” - деп жазды. Ламми АКШнын мамлекеттик катчысы Марко Рубио жана АКШнын атайын өкүлү Стив Виткофф менен Ак үйдө сүйлөшүүлөрдү өткөрүп, “келишим кагылышууну тереңдетпөөгө жардам бериши мүмкүн” деп белгиледи.
“Учурда дипломатиялык чечим табуу үчүн эки жумадай убакыт бар”.
Ламми жума күнү франциялык, германиялык жана ЕБлик кесиптештери менен бирге Ирандын тышкы иштер министри менен жолугушуу үчүн Женевага барарын билдирди. "Азыр Жакынкы Чыгыштагы олуттуу окуяларды токтотуу жана эч кимге пайда алып келбей турган аймактык чыңалууну алдын алдын ала турган учур” — деди.
24–25-июнда Гаагада өтө турган НАТО саммитине АКШнын президенти Дональд Трамп, Түркиянын президенти Режеп Таййип Эрдоган жана башка альянстын лидерлеринин катышары күтүлүүдө.
