Газага багыт алган Глобалдык Сумуд флотилиясына Израилдин кол салуусуна каршы чыккан жүздөгөн киши АКШнын Стамбулдагы консулдугунун алдына чогулушту.
TRT World телеканалы окуя болгон жерден кабарлагандай, демонстранттар ураан чакырып, Газадагы палестиналыктар үчүн дуба кылышты жана эл аралык коомчулукту, геноцид деп аныкталган бул абалга каршы чыгууга үндөштү.
Ушундай эле нааразылык акциялары Европанын бир катар шаарларында да өттү. Римде жүздөгөн демонстранттар, анын ичинде студенттер жана ар кандай профсоюздардын мүчөлөрү Термини станциясынын алдындагы Пьяцца-де-Синкесенто аянтына чогулушту.
Демонстранттар "Флотилия жана Палестина үчүн баарын тосолу" деген ураандарды чакырып, жол кыймылына бөгөт коюшту. Полиция метро станцияларын жаап, терминалга кирүүнү чектеди.
Уюштуруучулар 1,000дей демонстрант Piazza Barberini тарапка жүрүш жасоону пландаганын билдиришти.
Италиялык профсоюздар Unione Sindacale di Base (USB) жана Confederazione Generale Italiana del Lavoro (CGIL) бул окуяга каршылык көрсөтүү иретинде 3-октябрда жалпы улуттук иш таштоо жарыялашты.
Барселонада да жүздөгөн адамдар Израилдин флотилияга кийлигишүүсүн айыптоо жана Газадагы палестиналыктарга тилектештик көрсөтүү үчүн Израиль консулдугунун алдына чогулушту.
Берлинде Борбордук станцияга ондогон адамдар чогулуп, Брюсселде демонстранттар Place de la Bourse аянтынан Бельгиянын Тышкы иштер министрлигине чейин жүрүш жасашты. Лондондо активисттер бейшемби күнү нааразычылык акциясын өткөрүүнү пландап жатышканын жарыялашты.
Флотилияга кол салуу
Глобалдык Сумуд флотилиясынын уюштуруучулары Израилдин деңиз күчтөрү байланыштарды үзүп, эл аралык сууларда конвойду токтотконун билдиришти. Газа блокадасын бузуу боюнча эл аралык комитет (ICBSG) израилдик аскерлер Alma жана Sirius кемелерине киргенин тастыктады.
Активисттер Израилдин катерлери конвойго жакындап, кемелердин багытын өзгөртүүнү талап кылган видеолорду социалдык тармактарга жарыялашты.
Гуманитардык жардам жана медициналык буюмдарды ташыган флотилия августтун аягында жол тарткан жана бейшемби күнү эртең менен Газанын жээгине жетмек.
Бул бир нече жылдардан кийин Газага жөнөтүлгөн мындай чоңдуктагы биринчи жардам кербени болду. Флотилиянын курамында 50гө жакын кеме жана 45тен ашык өлкөдөн 532 жарандык ыктыярчы бар.
Газадагы 2,4 миллион палестиналык болжол менен 18 жылдан бери Израилдин курчоосунда жашап келет.
